Пасля пераходу грамадскага статку да зімова-стойлавага ўтрымання ў гаспадарках раёна значна паменшылася вытворчасць малака. І нічога ў гэтым не было б дзіўнага, бо пераход ад аднаго тыпу кармлення да другога ў любым выпадку суправаджаецца зніжэннем надояў, калі б гэтае падзенне вылічалася не 10, а 2–3 працэнтамі.
Чаму яшчэ на мінулым тыдні па вытворчасці малака раён не дасягаў нават узроўню мінулага года, не гаворачы пра рост? Што робіцца для выхаду з крызіснага становішча? Пра гэта і іншае наша размова з начальнікам аддзела інтэнсіфікацыі ўпраўлення сельскай гаспадаркі і харчавання райвыканкама Раісай Мікалаеўнай Дзівульскай.
– Раіса Мікалаеўна, якія фактары, на Ваш погляд, найбольш паўплывалі на зніжэнне надояў?
– Сёлета ў буйной рагатай жывёлы, як ніколі раней, з цяжкасцю праходзіла перастраенне з кармлення зялёнай масай на сянаж і сілас. Тым больш, што першапачаткова яны даваліся з малай колькасцю камбікорму, а бялковая сыравіна ў выглядзе рапсавых шротаў наогул практычна адсутнічала па прычыне дрэннага ўраджаю гэтай культуры.
Таму задача нумар адзін, якая стаяла перад кіраўніцтвам упраўлення сельскай гаспадаркі і харчавання райвыканкама і саміх сельгаспрадпрыемстваў: забяспечыць жывёлагадоўлю неабходнай колькасцю бялку, мінеральных і вітамінных дабавак. Толькі ў гэтым выпадку можна было разлічваць на станоўчыя змены.
– І гэта было зроблена?
– Так. На сённяшні дзень ва ўсіх гаспадарках, акрамя сельгаспрадпрыемстваў «Дворышча-Рас» і «Сокал», ёсць у наяўнасці 32 тоны рапсавых шротаў (калі будзе зроблена папярэдняя аплата, яны з’явяцца і ў астатніх гаспадарках).
Практычна ўсе сельгаспрадпрыемствы атрымалі 35 тон камбікорму з 22- працэнтным утрыманнем пратэіну. У асноўным ён выкарыстоўваецца для высокапрадукцыйных кароў.
На мінулым тыдні ў «Дворышчы-Рас» і «Сяляўшчыне» пачалі даваць і патаку. Дзякуючы клопату старшыні райвыканкама Аляксандру Мікалаевічу Шубскаму, не толькі гэтыя гаспадаркі, але і ўсе астатнія ў бліжэйшы час атрымаюць па вагону патакі. Потым яна будзе падвозіцца па меры неабходнасці. У рацыён кармлення жывёлы таксама будуць уключаць і жом з буракоў.
– Як размяркоўваюцца вышэйпералічаныя камбікармы і дабаўкі сярод статку?
– Сёлета была праведзена дастаткова сур’ёзная работа па расстаноўцы жывёл у адпаведнасці з іх фізіялагічным станам. Кожная група – навацельныя, дойныя, сухастойныя – не толькі атрымала строга вызначаныя месцы, але і свой асабісты рацыён кармлення. Так, навацельныя каровы, як правіла, штодзень атрымоўваюць 15 кг кукурузнага сіласу, 25 кг сенажу, не менш 6 кг камбікорму ў тры прыёмы, 1 кг шротаў.
А каб кармы лягчэй засвайваліся і прыносілі большую аддачу ў выглядзе дадатковых літраў малака, выкарыстоўваем кормазмяшальнікі і кормараздатчыкі. Падобная тэхніка цяпер ёсць практычна ва ўсіх гаспадарках, сёлета яшчэ два кормазмяшальнікі былі закуплены для сельгаскааператыва «Клясціцы» і сельгаспрадпрыемства «Сокал», і кормараздатчык для «Клясціц».
– Наколькі хутка меры, якія прымаюцца, прынясуць станоўчыя змены?
– Ужо цяпер у цэлым па раёне мы амаль дасягнулі ўзроўню мінулага года. Найбольш паспяхова пакуль працуюць сельгаспрадпрыемства «Сяляўшчына» і падсобная гаспадарка «Аграсервісу», у якіх адпаведна 110 і 117 працэнтаў складае валавая вытворчасць у параўнанні з мінулагоднім. Найбольшыя праблемы ў сельгаспрадпрыемства «Дворышча-Рас». Тут дояць толькі 73,1 працэнта да ўзроўню кастрычніка 2009 года.
– Якое месца па вытворчасці малака Расонскі раён займае сярод іншых рэгіёнаў Віцебшчыны?
– Калі браць паказчык за 9 месяцаў 2010 года, то са 105,6 працэнта ў параўнанні з сярэднеабласным у 96 працэнтаў Расонскі раён уваходзіць у тройку лідэраў.
Што датычыцца толькі кастрычніка, то мы, на жаль, пакуль у канцы абласной зводкі.
– Дзякуй, Раіса Мікалаеўна, за размову, і спадзяюся, што сітуацыя ў жывёлагадоўлі нашага раёна стабілізуецца. А гэта значыць, будзем чакаць высокіх надояў.
Фота аўтара.
