А сёлета Віцебскае абласное аддзяленне Беларускага Фонду Міру, як натхняльнік шматлікіх праектаў, напярэдадні Дня міру выступіў з асаблівай ініцыятывай:  усім  мамам,  якім  пашчасціла  нарадзіць дзіця  21  верасня,   было  вырашана ўручыць у  якасці падарунка   сертыфікат   на  100 тысяч  рублёў. Па Віцебшчыне нованароджаных  у  гэты  дзень аказалася  39  чалавек,   у  Расонскім  раёне –  адзін.
Для  Ірыны Карпенкі (на здымку) прыезд старшыні раённай арганізацыі Фонду Міру  Святланы Аляксандраўны Волкавай і журналіста  раённай газеты стаў прыемным  сюрпрызам.  Але, нягледзячы на нечаканасць,  маладая  мама  не  стрымлівала  радасці і здзіўлення, адразу згадзілася  сфатаграфавацца для нашага выдання з маленькім  сынам, якому ўчора  споўніўся  месяц. 

Максім  –  такое імя   сям’я  Кірыла  і  Ірыны Карпенкаў  абралі  для  свайго нашчадка –  у гэты  момант салодка спаў на  руках матулі,  і яму было зусім не да грандыёзнай падзеі.  Але  Ірына паклапоціцца, каб у свой час ён даведаўся і пра акцыю, і пра сертыфікат.

– Нараджэнне  дзіця – ужо  пасутнасці  самы  дарагі  падарунак, –  адзначае  маладая мама.  – Але   як прыемна, што  Максім нарадзіўся  менавіта ў Дзень міру. Я нават  і не  ведала, што праводзяцца  такія  акцыі. І хаця  грошы  невялікія, галоўнае, што  адчуваецца  падтрымка,   простая  чалавечая  ўвага,  клопат.

 Сертыфікат  я  абавязкова  захаваю,  каб  потым, як  сын  падрасце,    паказаць  дакумент і расказаць, што Максім увайшоў  у лік  нямногіх шчасліўчыкаў. 

А  вось  куды  Ірына  патраціць грошы,   яна  за некалькі  хвілін  вырашыць  не   паспела. Хаця, хутчэй за ўсё, як  і любая  мамачка,  на свайго  любага сыночка.

На думку Святланы Аляксандраўны, ідэя  віншаваць  мам  з   нованароджанымі  ў Дзень міру   невыпадковая  і патрэбная. Бо,  напэўна,    няма нічога  больш важнага,  чым мір, што  адлюстраваны  ў дзіцячых вачах...