З 15 па 21 лістапада  2010 года на тэлефон дзяжурнай часці  РАУС паступіла  35 паведамленняў.
*15 лістапада ў міліцыю паступіла паведамленне ад жыхаркі райцэнтра наконт крадзяжу маёмасці з яе кватэры. Злачынцам аказаўся вадзіцель транспартнага аддзела райспажыўтаварыства. Ён раней пражываў у кватэры і меў ад яе ключ, скарыстаўшыся якім украў газавую пліту «Брэст», коўдру, два пледы, 2 камплекты бялізны  і іншае на агульную суму 748 тысяч рублёў. Узбуджана крымінальная справа.

Наогул на мінулым тыдні зарэгістравана некалькі крадзяжоў, сярод якіх крадзёж інструментаў з дома ў Альбрэхтаве, які знаходзіцца на стадыі будаўніцтва,  а таксама адзення, парфумерыі, прадмета мэблі на агульную суму 358 тысяч рублёў з кватэры жыхаркі райцэнтра.

*18 лістапада ў РАУС патэлефанавала жыхарка вёскі Кавалі. Яе сына – навучэнца Наваполацкага дзяржаўнага палітэхнічнага каледжа – пабіў былы аднакласнік,  жыхар аграгарадка Клясціцы. Хлопец атрымаў удар мяккіх тканін галавы і тулава. Вядзецца разбірацельства.

* На мінулым тыдні адбыліся два дарожна-транспартныя здарэнні, у якіх пацярпела два чалавекі. Першае – каля аграгарадка Клясціцы. Вадзіцель грузавога аўтамабіля выехаў на сустрэчную паласу і зрабіў наезд на рабочага СФГ Барадулькіна, што рухаўся на веласіпедзе. Пацярпелы быў гаспіталізаваны. Другое дарожна-транспартнае здарэнне  адбылося на вуліцы імя Талстога, што ў г.п. Расоны. Вадзіцель, жыхар райцэнтра 1970 года нараджэння, вечарам 21 лістапада наехаў на вучня 9 класа Расонскай школы, нават нягледзячы на тое, што той меў на адзенні святлоадбівальныя элементы. Хлопец гаспіталізаваны з пераломамі малай галёначнай косці і аднаго рабра. Вядзецца разбірацельства.

* 20 лістапада супрацоўнікі РАУС затрымалі аўтамабіль «Мерсэдэс-Бэнц»  пад кіраўніцтвам жыхара Брэсцкай вобласці, які ўвозіў на тэрыторыю нашай краіны без неабходных дакументаў 20 тон садавіны на  суму 60 мільёнаў 426 тысяч рублёў.  
 
На мінулым тыдні супрацоўнікі раённага аддзела па надзвычайных сітуацыях
*...Выязджалі на два ўзгаранні. Спачатку ў в. Якубова гарэла летняя драўляная кухня плошчай 9 квадратных метраў, а праз два дні – хлеў  у Галоўчыцах плошчай 16 квадратных метраў. Урон склаў адпаведна 100 і 300 тысяч рублёў.