19  студзеня ў Беларусі адзначаецца  Дзень выратавальніка. Улічваючы  тое, што колькасць надзвычайных сітуацый прыроднага і тэхнагеннага характару  ўзрастае, супрацоўнікі службы  застаюцца   незаменнымі  пры выратаванні людзей на пажарах, у час павадкаў, аўтамабільных катастроф і іншых здарэнняў.

Кіраўнік  раённага    аддзела   па  надзвычайных  сітуацыях   Аркадзь Гарохаў напярэдадні  свята  адзначыў: «Мужнасць, прафесіяналізм і адданасць прафесіі – адметныя якасці нашых хлопцаў. Ганаруся, што сваёй працай яны заваявалі павагу  людзей ». 

Вызначаючы стратэгію на 2011год,  Аркадзь Гарохаў падкрэсліў: «Прыярытэтным напрамкам   для  РАНС з’яўляецца больш актыўная праца выратавальнай службы ў колькасці 52 супрацоўнікаў  па скарачэнні  часу  рэагавання  і зніжэнні  колькасці пацярпелых і загінуўшых пры пажарах і  іншых надзвычайных  сітуацыях ». У  размове   закранулі  і  леташнія  вынікі  працы.

– Мінулы год для нашых  выратавальнікаў быў даволі напружаным. Пра што гавораць і лічбы. Так, на працягу 2010-га было здзейснена  56  баявых выездаў, у тым ліку на тушэнне пажараў 33 (што на 9 больш, чым у папярэднім годзе). Канкрэтней, 7  пажараў адбыліся ў райцэнтры і 2 6  – у  сельскіх населеных пунктах. У выніку баявой працы выратаваны ад агню 1 чалавек, папярэджана знішчэнне агнём 86 будынкаў і 2  адзінкі  тэхнікі.

Асноўнымі прычынамі пажараў застаюцца неасцярожнае абыходжанне з агнём, няспраўнасць  пячнога ацяплення і электраабсталявання, дзіцячае свавольства. У мінулым годзе загінулі  4 чалавекі і ўжо два ў новым. Галоўным чынам,  гэтым трагічным   смерцям папярэднічала курэнне ў нецвярозым стане.

Як вядома, працаўнікамі  праводзіцца вялікая прафілактычная работа па папярэджанні пажараў і гібелі людзей на іх. Асноўны  ўхіл  тут робіцца на жылы сектар, на працу з насельніцтвам. Кожны работнік мае свой участак прафілактыкі – гэта ці вуліцы ў гарадскім пасёлку, ці населены пункт. Нярэдка выратавальныя дзеянні накіраваны і на супрацьдзеянне іншым прыродным катаклізмам, аказанне дапамогі ў розных  неардынарных сітуацыях.

 Адным словам, сапраўднаму выратавальніку трэба быць не толькі мужным і адважным, але  ўмелымі і граматнымі.

І ў заключэнне лепшых Аркадзь Гарохаў называць не стаў, а павіншаваў усіх.
– Увесь наш калектыў працаздольны, выконвае пастаўленыя задачы. З Днём выратавальніка вас, сённяшнія калегі і ветэраны. Здароўя, усялякіх выгод, поспехаў у працы.