Кіраўніцтва Наваполацкага аддзела Дэпартамента аховы Міністэрства ўнутраных спраў Рэспублікі Беларусь працягнулі руку дапамогі выхаванцам сацыяльнага прытулку.

Да пачатку сустрэчы супрацоўнікі аддзела заносілі ў музычна-спартыўную залу ўстановы каробку за каробкамі. У іх дзве пары дзіцячага абутку, мыла, пральныя парашкі і іншыя мыйныя сродкі на агульную суму 1 мільён 682 тысячы рублёў. Аднак большасць ёмістасцяў з паперы былі запоўнены цацкамі і дзіцячым адзеннем, якія калектыў аддзела (а гэта 436 чалавек) сабраў для выхаванцаў прытулку ў Расонах. Не забылі госці пра вялікі торт і мандарыны – атрыбуты навагодніх святаў.

А калі прыйшоў час і дзеці з падлеткамі зайшлі ў залу, начальнік аддзела Аляксандр Вярбенка, выконваючы абавязкі першага намесніка начальніка Дзмітрый Паўленка і намеснік начальніка Ігар Русак  шчыра віталі іх. Аляксандр Валерыевіч за некалькі хвілін пазнаёміў са структурай, якую ён узначальвае, і асноўнымі задачамі, што стаяць перад супрацоўнікамі аддзела. Потым паказаў падарункі, падрыхтаваныя для выхаванцаў, а напрыканцы паабяцаў у сакавіку арганізаваць экскурсію ў Наваполацк з наведваннем базы Наваполацкага ад-дзела Дэпартамента аховы МУС Рэспублікі Беларусь.

– Мы вам пакажам зброю, якая ёсць у   нашых супрацоўнікаў, наведаем памяшканні з 10 службовымі сабакамі, што дапамагаюць нам несці службу, – дзяліўся планамі падпалкоўнік. – Магчыма, пасля гэтага некаторыя з вас вырашаць звязаць свой лёс з прафесіяй міліцыянера. Мы толькі будзем рады.

Дзеці і падлеткі падзяквалі за падарункі і магчымасць пабываць з экскурсіяй у Наваполацку і ў сваю чаргу  падаравалі гасцямі дамавічка, зробленага ўласнымі рукамі, і каляндарыкі на 2012 год з выявай дзіцячага сацыяльнага прытулку.

– Для нашага аддзела – гэта першы вопыт удзелу ў рэспубліканскай навагодняй добраахвотнай акцыі “Нашы дзеці”, – ужо пасля сустрэчы сказаў Аляксандр Валерыевіч. – Мы практычна адразу вызначыліся з установай, куды б хацелі накіраваць  дапамогу. Кіраўніцтва дзіцячага сацыяльнага прытулку  ў Расонах з гатоўнасцю адгукнулася на нашу прапанову, і менавіта па яго просьбе былі набыты мыйныя сродкі і абутак.

А што датычыцца цацак і дзіцячага адзення, то мы нават і не думалі, што супрацоўнікі аддзела так хутка і актыўна адгукнуцца на заклік сабраць іх. Спадзяюся, што наша супрацоўніцтва з прытулкам стане пастаянным і цікавым, а падарункі спадабаюцца хлопчыкам і дзяўчынкам.