Абыякавыя адносіны да ўласнай маёмасці ў большасці з нас перайшлі ў звычку. Падумаеш, не зачынілі дзверы ў хлеў і гараж – вакол людзі добра знаёмыя, свае. Ды і наогул, каму спатрэбіцца трус або рыдлёўка? Па гэтай жа прычыне мы пакідаем веласіпеды каля магазінаў і пад’ездаў, грошы і мабільныя тэлефоны на самых бачных месцах у хаце, сельгасінвентар на прыдамавой тэрыторыі. А потым здзіўляемся і разводзім рукамі, у значнай колькасці выпадкаў па ўласным жаданні запрашаючы ў хату злодзея ды яшчэ выпіваючы з ім чарку– другую. Па стане на 11 красавіка 2012 года на тэрыторыі Расонскага раёна па лініі крымінальнага вышуку ўжо зарэгістравана дваццаць злачынстваў, тры з якіх крадзяжы дзяржаўнай маёмасці і чатырнаццаць– уласнай. Праглядваючы па іх зводную інфармацыю, больш за ўсё здзіўляешся апошняй калонцы “Спосаб учынення”. У дванаццаці выпадках з чатырнаццаці злачынцы трапілі ў прыватны дом, гаспадарчую пабудову або на двор, гаворачы юрыдычнай мовай, дзякуючы свабоднаму доступу.
Вось толькі некалькі фактаў нашай бесталковасці. Ноччу ў пачатку сакавіка невядомая асоба зайшла ў двор прыватнага дома па вуліцы імя Някрасава ў райцэнтры і выцягнула труса з клеткі, кошт якога ацэнены ў 150 тысяч рублёў.
У лютым жыхар гарадскога пасёлка, асоба якога ўжо вы-светлена, блізка да поўначы прыйшоў у двор шматкватэрнага дома №2 па вуліцы Кастрычніцкая, каб зняць з аўтама-біля колы. Гэта ён зрабіў лёгка і без перашкод, тым самым прычыніўшы ўрон гаспадару транспартнага сродку на суму ў 2 мільёны рублёў.
Пасля распіцця спіртных напояў жыхар Альбрэхтава ішоў ад аднавяскоўца. На выхадзе з хаты вырашыў заглянуць у кладоўку, дзе ўбачыў бензапілу “Шціль”. Узяў яе ды пайшоў сваёй дарогай.
Без усялякіх перашкод раней асуджаны жыхар райцэнтра трапіў у прыватны дом па вуліцы імя Лапенкі і адтуль украў прадукты харчавання і маёмасць на суму 845 800 рублёў.
Як расказаў начальнік раённага аддзела ўнутраных спраў Аляксандр Ліленка, толькі дзякуючы прафесіяналізму супрацоўнікаў міліцыі з 17 крадзяжоў усіх відаў па 12 выяўлены падазроныя асобы, а гэта каля 71 працэнта. Дзевяць крымінальных спраў накіраваны або разгледжаны ў судзе раёна.
Па пяці злачынствах працягваецца работа.
Аляксандр Мікалаевіч у чарговы раз звяртаецца да жыхароў раёна з просьбай больш уважліва і беражліва адносіцца да ўласнай маёмасці. Бо як сто ці пяцьдзесят гадоў таму, так і ў пачатку 21 стагоддзя перш за ўсё бяруць тое, што «дрэнна ляжыць». А ляжыць у нас без нагляду ой як шмат чаго.
Таму начальнік РАУС перш за ўсё раіць звярнуць увагу на недапушчэнне свабоднага доступу ў прыватныя пабудовы. Для гэтага існуюць замкі і іншыя больш сучасныя прыстасаванні. Яны каштуюць куды менш, чым тое, што зачыняюць. Таму, калі на дзвярах вашага хлява, лазні або гаража не вісіць замок, спяшайцеся ў магазін! Наогул, ідэальны варыянт – пастаноўка пабудоў на сігналізацыю Наваполацкага аддзела Дэпартамента аховы МУС Рэспублікі Беларусь.
Яшчэ адна парада – больш прыдзірліва выбірайце людзей, з якімі ў сябе дома праводзіце вольны час. Не трэба выпіваць з любым, хто жадае выпіць, тым больш, калі вы ведаеце, што ён або яна нячыстыя на руку. Пасля падобных візітаў часцей за ўсё знікаюць грошы і мабільныя тэлефоны.
Асабліва Аляксандр Мікалаевіч хоча папярэдзіць гаспадароў веласіпедаў. Менавіта гэты транспартны сродак становіцца ахвярай злодзеяў каля магазінаў, у пад’ездах і нават у лесе. Каб не пазбавіцца любімага веласіпеда, паклапаціцеся пра элементарныя прыстасаванні, якія, пакуль вы адсутнічаеце, прымацуюць транспартны сродак да дрэва, поручняў і іншых прадметаў. Гэтага бу-дзе дастаткова, каб больш-менш упэўнена пакідаць веласіпед у адзіноцтве і займацца ўласнымі справамі, бо лік крадзяжоў транспартнага сродку ў 2012 годзе ўжо адкрыты.
Напрыканцы начальнік РАУС нагадаў, што пры неабходнасці ў межах сваёй кампетэнцыі ён заўсёды выслухае любога расонца і паспрабуе дапамагчы. Патэлефанаваць і расказаць пра сваю праблему можна ў час “прамых ліній”, якія праходзяць кожны трэці аўторак месяца з 9.00 да 11.00 па тэлефоне 4-13-62, а таксама ў любы іншы час. Аляксандр Мікалаевіч заўсёды гатовы да адкрытай і змястоўнай гутаркі.
