Гiсторыя і сучаснасць
Сёння свята ўсіх, хто неабыякавы да роднага слова, да роднай культуры. Кожны народ стварыў хаця б адзін твор геніяльны, і гэтым геніяльным творам з’яўляецца мова. Як геніяльным з’яўляецца слова, пачынаючы ад Еўфрасінні Полацкай, Кірылы Тураўскага ці Францыска Скарыны, лірыкі Багдановіча, класікі Купалы і Коласа, гістарычнай праўды Караткевіча і Быкава. Зразумела, што да гэтага выключнага слова належыць і творчасць вельмі важнай асобы для нашай краіны Івана Мележа.
Пачынаючы з 1994 года Дзень пiсьменнасці традыцыйна праводзiўся ў гарадах, якiя з’яўляюцца гiстарычнымі цэнтрамі культуры, навукi, лiтаратуры i кнiгадрукавання. У iх лiку — Полацк, Тураў, Навагрудак, Нясвiж, Орша, Пiнск, Заслаўе, Мсцiслаў, Мiр, Камянец, Паставы, Шклоў, Барысаў, Смаргонь, Хойнікі, Ганцавічы.
Ушанаваць старажытных майстроў слова і волатаў духу збіраецца сённяшняя культурная эліта. А рэдкія кніжныя рарытэты, якія звычайнаму чытачу былі б недаступны, выходзяць ў масавы тыраж.
Дзевятнаццаты День беларускай пісьменнасці праходзіць у абноўленай канцэпцыі. Ён напоўнены шэрагам тэматычных мерапрыемстваў, у першую чаргу, прыўрочаных да юбілеяў класікаў беларускай літаратуры — Янкі Купалы і Якуба Коласа.
У цэлым жа мерапрыемствы аб’ядноўваюцца пад знакам Года кнігі ў Беларусі.
Ганцавічы перадалi эстафету свята Глыбокаму…Арганізатарам i ўдзельнiкам яно запомнiцца сваёй напружанасцю i шалёным рытмам падчас падрыхтоўкi да мерапрыемства, калi на ўлiку кожная хвiлiнка.
Ужо сёння, 1 верасня, расчыніць свае дзверы бібліятэка сямейнага чытання, дзе пройдуць выстава-прэзентацыя “Паэтычная гасцёўня”, узнагароджанне пераможцаў 20 Рэспубліканскага конкурсу “Бібліятэка – асяродак нацыянальнай культуры”. Міжнародны круглы стол “Пісьменнік. Кніга. Час.” працуе з 12.00.
Разнастайныя тэматычныя выставы і канцэрты парадуюць наведвальнікаў у Доме культуры, па цэнтральных вуліцах Глыбокага.
У другой палове дня ў райвыканкаме адбудзецца навукова-практычная канферэнцыя “Глыбоцкія чытанні”, арганізатарамі якіх выступілі Нацыянальная акадэмія навук, Міністэрства інфарамцыі Рэспублікі Беларусь, Міністэрства культуры Рэспублікі Беларусь, Глыбоцкі райвыканкам.
Юныя чытальнікі прадэманструюць свае навыкі ў конкурсе “Жывая класіка” у зале гісторыка-этнаграфічнага музея. А завершыцца святочны дзень этнадыскатэкай “старадаўнія рытмы”у вёсцы Празарокі.
Святочная нядзеля распачнецца Божай Літургіяй у кафедральным саборы Нараджэння. Працягнецца ў скверы на плошчы і распачнецца ўрачыстым шэсцем. Цырымонія ж адкрыцця адбудзецца ў палудзень на галоўнай эстрадзе горада. Парадуюць глыбачан і гасцей раёна Нацыянальны акадэмічны народны хор Рэспублікі Беларусь імя Г. Цітовіча, выступленні беларускіх і замежных артыстаў, паэтаў, пісьменнікаў. У рамках свята арганізаваны выставы, фестываль кнігі і прэсы, цікавыя сустрэчы з вядомымі літаратарамі, конкурсы,майстар-класы, плэнэры, прэзентацыі. Уражанняў хопіць усім – і дзецям, і дарослым. Таксама па традыцыі на Дні беларускага пісьменства праходзіць ўзнагароджанне пераможцаў конкурсу на лепшыя літаратурныя творы года, навукова-практычная канферэнцыя і шэраг іншых мерапрыемстваў. Будзе працаваць спартыўны панадворак, тракт нацыянальных культур.
Увогуле, Дзень пiсьменнасцi аб’ядноўвае старонкi багатай гiсторыi i намаганнi пакаленняў суайчыннiкаў, якiя шанавалi i неслi свету беларускую мову, збераглi культурную спадчыну, стварылi асветнiцкiя цэнтры, залажылi фундамент далейшага духоўнага развiцця радзiмы.
Самая ж галоўная адметнасць Дня беларускай пiсьменнасці заключаецца ў тым, што шануецца i не забываецца родная мова. І гэта — узор дзяржаўнага клопату аб развiццi нацыянальнай культуры i духоўнасцi, наглядны прыклад любовi не толькi да роднага слова, але i да сваёй культуры, да Бацькаўшчыны
