Быць сапраўднай гаспадыняй не толькі асабістай сядзібы, а яшчэ і Дома паляўнічага – справа не з лёгкіх. Гэта трэба любіць, і тады вынік атрымаецца вышэйшы за ўсялякія пахвалы. Менавіта так адгукаюцца блізкія і госці Тофеляў пра Галіну Пастарэ, якая 23 гады таму пераехала на Расоншчыну з Літвы. Тут “пусцілі карані” і 5 сясцёр, 2 браты Галіны Тадэушаўны. Спачатку яна абаснавалася ў дзядзькі ў Янкавічах. Працавала аператарам машыннага даення на ферме. А потым, пазнаёміўшыся з хлопцам з Тофеляў, пераехала туды. Пабудавалі дом, абзавяліся гаспадаркай – 2 каровы, бык, конь, свінаматкі – якой толькі жывёліны не было на падвор’і руплівых гападароў!
У Тофелях Галіна сумяшчала работу на цялятніку з хатнімі абавязкамі і гадавала дачку, якая ўжо выйшла замуж і жыве ў Верхнядзвінску. Таццяна з мужам амаль кожныя выхадныя наведвае матулю. А яна, у сваю чаргу, балуе родных смачнай выпечкай, хатнімі нарыхтоўкамі.
Асаблівы смак беларускіх нацыянальных страў, якія на “выдатна” навучылася гатаваць Галіна на Расоншчыне, адзначаюць турысты з далёкага і блізкага замежжа, што прыязджаюць у Дом паляўнічага круглы год. Тут жанчына таксама паўнапраўная гаспадыня – загадчыца і кулінар у адной асобе. Галубцы, дранікі, запечаная бульба з грыбамі, боршч, клёцкі, хатнія пельмені – усё гэта са стараннем самай гасціннай гаспадыні прапануе Галіна Тадэушаўна турыстам з Польшчы, Італіі, Францыі, Германіі. Жанчына жартуе, што палякі заўсёды дзівяцца селядцу пад шубай, не разумеючы, як спалучэнне настолькі розных складаючых прыводзіць да такога смачнага выніку.
А яшчэ Галіна – вялікі эксперыментатар. Гэта прасочваецца як у адносінах да прыгатавання ежы, дамашніх кансерваванняў, так і ў аздабленні сядзібы, прысядзібнага ўчастка. Асноўнае месца на немалым агародзе займаюць не цыбуля з морквай, а кветнікі. Хаця муж іншы раз і паскардзіцца, што лепей бы больш агародніны садзіць, Галіна ласкава пераводзіць тэму на прыгажосць вакол дома і прыемны настрой, які стварае гэта самая прыгажосць. А градак, парнікоў і без таго хапае – дамашнія нарыхтоўкі па ўласных рэцэптах і з часопісаў таму пацвярджэнне. Іншы раз балуе спаржай у тамаце, аджыкамі, леча, балгарскімі агурочкамі і мочанымі яблыкамі не толькі сям’ю, а і паляўнічых. Спрытная, працавітая, Га-ліна знаходзіць час і на грыбы з ягадамі. Лес і яго дары – агульнае яе з мужам, працаўніком Янка-віцкага лясніцтва, захапленне. А яшчэ – усведамленне важнасці надзейнага сямейнага ачага, дзе ёсць і ўтульнасць, і ўзаемаразуменне.
