За нараджэнне і выхаванне дзяцей ордэна Маці ўдастоены дзве жанчыны нашага раёна: жыхаркі Краснаполля і Дворышча Валянціна Свярдлова і Надзея Мядзвецкая. Ушанавалі маці-гераінь старшыня раённага Савета дэпутатаў Генадзь Акімавіч Фёдараў і намеснік старшыні райвыканкама Галіна Аляксееўна Падвіцельская.

На свяце, якое было наладжана  самадзейнымі артыстамі Краснапольскага сельскага  Дома культуры,  і пяці хвілін   не прайшло, як атмасфера ў зале панавала такая, нібыта  за сталом сабраліся сваякі. Зрэшты, чаму тут дзівіцца, калі ў гэты дзень ушаноўвалі шматдзетную маці Валянціну Свярдлову, у якой усё жыццё «круціцца» вакол адной-адзінай восі –  дзяцей, сёння – унукаў.

На сцэне не прамаўлялі гучныя словы: «Як няпроста нарадзіць, выхаваць і паставіць на ногі пяцёра!». І не толькі таму, што для Свярдловых падобны этап ужо пройдзены:  дзеці  дарослыя, вызначыліся з прафесіямі, паспелі самі стаць татамі і мамамі. Для іх нараджэнне і выхаванне дзяцей – проза жыцця, усвядомлены выбар, крыж лёсу, калі жадаеце.
Аднак у вяскоўцаў свая кропка гледжання: гэта бацькоўскі подзвіг. Колькі намаганняў трэба, каб пяцёра  дзяцей атрымалі ад бацькоў сваю порцыю кахання, клопату, цяпла, пяшчоты, каб кожны з іх навучыўся любіць радзіму, шанаваць людзей, быць высакародным  і спагадлівым.
Пры першым знаёмстве з  Валянцінай Карлаўнай  цяжка адразу ўявіць, што яна шматдзетная мама. Перад мной  стаяла  абаяльная жанчына, якая  збянтэжана апускала вочы, нібы саромілася  ўсміхацца. Падчас урачыстай цырымоніі  крыху разгубілася, а калі я стала віншаваць  і задаваць пытанні – расчулілася. Столькі  ўвагі ёй адной!

– Мае дзеці вельмі розныя па характары, – расказвае Валянціна  Карлаўна,–часам нялёгка  было знайсці паразуменне адразу з усімі. Але я прытрымлівалася такой пазіцыі ў выхаванні: дзіця з самага юнага ўзросту павінна  вучыцца самастойна прымаць рашэнне, нават калі яно будзе памылковае.

 Вядома, гадаваць пяцёра  заўсёды нялёгка. Аднак Свярдловы  на гэтым  не засяроджваліся:    праца, падсобная гаспадарка,  дзяржаўная падтрымка, самі майстры на ўсе рукі. Валянціна Карлаўна  і сёння ўсюды паспявае: абеды рыхтуе, падзарабляе, радуецца поспехам унукаў, якіх чацвёра. Да яе  прыйшло «другое дыханне».