15 гадоў таму, 15 сакавіка 1994 года, у Рэспубліцы Беларусь была прынята Канстытуцыя, якая з’яўляецца галоўным Законам у краіне. У нашым раёне гэты дзень асаблівы: на працягу шэрагу гадоў  ва ўрачыстай абстаноўцы юнакам і дзяўчатам, каму споўнілася 16, уручаецца першы і самы важны ў іх жыцці дакумент – пашпарт грамадзяніна Рэспублікі Беларусь.

Сёлета  на сцэне РДК  уручэнне прайшло ў межах раённай акцыі «Мы – грамадзяне Беларусі», арганізаванай РК БРСМ і аддзелам па справах моладзі райвыканкама. Уладальнікамі пашпартоў стала 20 старшакласнікаў. Натуральна, не магло абысціся ўрачыстае мерапрыемства без выступлення старшыні райвыканкама Аляксандра Шубскага, які разам з інспектарам групы па грамадзянстве і міграцыі РАУС Ганнай Качанавай уручылі школьнікам пашпарты.

– Цяпер вы – паўна-праўныя грамадзяне нашай дзяржавы, –  звярнуўся да юнакоў  і дзяўчат Аляксандр Мікалаевіч. – Я ад усёй душы  хачу павіншаваць усіх прысутных з Днём Канстытуцыі Рэспублікі Беларусь.

Думаю, вельмі знамянальна, што менавіта ў гэты дзень вы атрымліваеце самы галоўны дакумент , паколькі Канстытуцыя –  гэта гарант жыцця нашага грамадства. Атрымаўшы пашпарт, вы сталі людзьмі, якія абавязаны адказваць за свае ўчынкі з пазіцыі не школьніка, а з пазіцыі грамадзяніна, які будзе галасаваць, уносіць свой уклад у далейшае  развіццё нашага грамадства. Памятайце пра гэта. Як і пра тое, што расонская  зямля – святая зямля. Яна  дала жыццё вашым бацькам, бабулям, дзядулям, якія  даказвалі права на яе існаванне, імкнуліся, каб наша Рэспубліка заўжды жыла.

Вы сталі людзьмі, на якіх будуць раўняцца іншыя школьнікі. Таму вы павінны быць крыху лепш, чым былі да гэтага, каб кожны ваш крок, жэст, слова былі ўсвядомленыя. Я жадаю, каб па жыцці вам заўсёды спадарожнічаў поспех, каб вы былі сумленнымі, адказнымі, даказвалі сваю значнасць вучобай, дасягненнямі, добрымі справамі і адпавядалі статусу грамадзяніна Рэспублікі Беларусь.

Намеснік начальніка аддзела адукацыі Вольга Спірыдонава таксама павіншавала маладых лю-дзей і падкрэсліла: «Вашы веды, маладосць, энергія неабходныя нашай  маладой дзяржаве. Таму я жадаю вам поспехаў у вучобе, у выбары далейшага жыццёвага шляху, моцнага здароўя і ўсяго лепшага. Будзьце сапраўднымі і годнымі грамадзянамі нашай Расоншчыны і краіны».
– Віншую вас з Днём Канстытуцыі, а гэтак жа з тым, што вы атрымалі свой першы ў жыцці дакумент, –  звярнулася да старшакласнікаў першы  сакратар РК БРСМ  Вольга Шэліхава.  – Жадаю вам актыўнай грамадзянскай пазіцыі, поспехаў ва ўсім, а галоўнае – быць годнымі грамадзянамі нашай рэспублікі. Памятаеце, за вамі будучыня і толькі ад вас залежыць, якая яна будзе.
Са  словам у адказ выступіла і вучаніца Расонскай школы Юлія Малашанка, якая ад сябе і ад  імя ўсіх, хто  атрымаў пашпарты, паабяцала: «Мы зробім усё для пабудовы моцнай дзяржавы і будзем годнымі памяці тых, хто аддаў сваё жыццё за гонар і незалежнасць нашай радзімы».
Кожны юны грама-дзянін атрымаў  у дадатак да пашпарта памятны падарунак ад РК БРСМ і ад-дзела па справах моладзі.  А салісты раённага Дома культуры падарылі прысутным добрыя песні і святочны настрой. Закончылася цырымонія фота-здымкам на памяць.