Напярэдадні Вялікадня мы наведалі касцёл у Расонах, сустрэліся са святаром рымска-каталіцкай парафіі святога Язэфата Кунцэвіча ксяндзом Вацлавам (на здымку). 

–Уваскрэсеннем Пана з мёртвых быў здзейснены подзвіг выратавання чалавецтва, прымірэнне людзей са Стварыцелем. А гэта аснова веры, першая і самая галоўная ісціна, якая сімвалізуе перамогу жыцця над смерцю, адраджэнне і абнаўленне духоўнага свету чалавека. У гэты дзень вернікі святкуюць сваё адкупленне і магчымасць асягнення вечнага шчасця, што было здабыта коштам крыжовай смерці і з мёртвых паўстання Збаўцы, – пачаў свой аповедксёндз Вацлаў.

– Святкаванне распачынаецца ў Вялікі чацвер, калі Езус Хрыстус сабраў вучняў сваіх на тайную вячэру. Тайная ў тым значэнні, што адбылася вялікая таямніца – Хрыстус сеў з апосталамі за стол, узяў у рукі хлеб, блаславіў, ламаў і раздаваў вучням, пры гэтым  кажучы: “Бярыце і ешце– гэта маё цела, якое за вас будзе выдана . Гэта чыніце на маю памяць”. Пазней браў келіх з віном, маліўся і гаварыў: “Гэта мая кроў, якая за вас будзе праліта. Гэта чыніце на маю памяць”.
У часе Святой Імшы адбываецца тая ж самая падзея: прыходзім да святой камуніі (прычасць), спажываем і адчуваем смак хлеба, смак віна, аднак вачыма веры прымаем, што пад відам хлеба і віна спажываем Цела і Кроў Хрыста. І ў гэтым – вялікая таямніца. Кожны, хто прымае Эўхарыстыю, мае ў сабе жыццё вечнае. Эўхарыстыю прымае той, хто не мае грэху цяжкага. Грэх лічыцца цяжкім, калі чалавек свядома адкідае Бога, ягоныя прыказанні, грашыць.

У Вялікую суботу адбываецца самая галоўная Пасхальная Літургія. І пачынаецца яна ў цішыні і смутку, але з прадчуваннем радасці, са спевамі і чытаннямі.Кульмінацыяй з’яўляецца спеў радаснага Аллелюя, гімна “Хвала на вышынях Богу!” як знак, што Хрыстус у гэты час уваскрасае.
У гэтым годзе Святочная Літургія адбудзецца ў суботу ў 20 гадзін,  у нядзелю –  у 9 гадзін.
У Вялікдзень важна адкрыць сваё сэрца для Бога і бліжняга. Па прыкладзе Збаўцы атуліць цяплом і клопатам іншых людзей, а асабліва тых, хто мае патрэбу ў дапамозе і спагадзе. За падарункамі і пачастункамі варта не згубіць сапраўдную радасць Вялікадня, якая грунтуецца на трыумфе непераможнага Бога.

З нагоды надыходзячага Свята Таямніцы Велікоднай жадаю ўсім глыбокага перажывання штодзённасці. Няхай Уваскрэслы Хрыстус дасць вам надзею і адвагу ўваходзіць у будучыню, дзе Ён вас чакае. Няхай вам дасць сілу веры, напоўніць вашы сем’і велікодным супакоем, еднасцю і здольнасцю дараваць адно аднаму.
Усім братам і сёстрам праваслаўным жадаю глыбокага перажывання Вялікага посту і асабістай сустрэчы з Уваскрэслым Госпадам! Узаемна сабе жадаем і молімся, каб у рэшце рэшт настаў час, калі адной хрысціянскай сям’ёй, такой багатай і разнастайнай, будзем ушаноўваць Жывога Уваскрэслага Езуса. 
Жадаю ўсім расонцам дабра, шчасця і радасці святкавання Вялікадня са сваімі роднымі і блізкімі. Няхай Бог не пакідае вас, але жыве ў вашых сэрцах і ў вашым жыцці, каб вы змаглі дасягнуць паўнаты шчасця і дабрабыту. Міру і пакою для нашай краіны і для ўсяго свету! Хрыстус Уваскрэс! Сапраўды Уваскрэс! Аллелюя!