Старшыня праўлення Нацыянальнага банка Рэспублікі Беларусь і адначасова старшыня Беларускага саюза жанчын Надзея Ермакова разам з членам праўлення грамадскай арганізацыі “Беларускі саюз жанчын” Святланай Смірновай, дырэктарам Гарадзейскага сахарнага камбіната,членам Савета Рэспублікі Міхаілам Крыштановічам наведала Расонскі раён акурат у апошні дзень рэспубліканскай акцыі “Нашы дзеці”.
Шчыра віталі высокіх гасцей на расонскай зямлі старшыня раённага выканаўчага камітэта Аляксандр Шубскі, намеснік старшыні Галіна Падвіцельская, дырэктар ЦБП №217 ААТ “АСБ Беларусбанк” Юлія Калодзіч.
А хлебам-соллю, прыгожым караваем сустракалі сталічную дэлегацыю супрацоўнікі і наведвальнікі Тэрытарыяльнага цэнтра сацыяльнага абслугоўвання насельніцтва і выхаванцы дзіцячага сацыяльнага прытулка.
З гісторыяй і жыццём сваёй установы гасцей пазнаёміла дырэктар ТЦ САН Ганна Ясінская. За 10 год існавання структура разраслася і на сённяшні дзень уключае 7 падраздзяленняў. Кіраўнік не без гонару падзялілася, што летась адзіныя ў вобласці адкрылі аддзяленне дзённага знаходжання для грамадзян пажылога ўзросту на 14 чалавек.
За лік сродкаў упраўлення па працы, занятасці і сацыяльнай абароны райвыканкама прадаставілі некалькі рабочых месцаў інвалідам. У час гутаркі Надзеі Ермаковай паказалі памяшканні ўстановы, яна размаўляла з людзьмі з абмежаванымі магчымасцямі, іх бацькамі, педагогамі, распытала пра праблемы, пацікавілася напрацоўкамі і ўвогуле жыццём аддзяленняў. Не засталося ў гасцей сумненняў, што ў Расонскім ТЦ САН у поўнай меры выконваецца галоўная задача – забяспечваецца рэальная падтрымка тым, хто ў сілу свайго сацыяльна-эканамічнага становішча не можа ўдзельнічаць у грамадскай вытворчасці і знаходзіцца ў цяжкай жыццёвай сітуацыі.
Для правядзення максімальна магчымай сацыяльнай адаптацыі наведвальнікаў Цэнтра і насельніцтва, што абслугоўваецца ў аддзяленнях, распрацаваны і дзейнічаюць сацыяльныя праграмы і праекты, працуюць рэабілітацыяйныя майстэрні, гурткі і клубы па інтарэсах.
Што тычыцца сацыяльнага прытулку, то ў раёне з багатай духоўнай культурай і ўсебаковай падтрымкай раённай выканаўчай улады, проста не можа быць кінутых дзяцей. Кранулі старшыню грамадскай арганізацыі “Беларускі саюз жанчын” лісты маленькіх выхаванцаў сацыяльнага прытулка да сваіх педагогаў. А іх за 9 гадоў назапасілася нямала.
Таму само слова “прытулак” у адносінах да Расон не асацыіруецца з неблаганадзейнасцю і казённасцю.
“Я бачу, што ў гэтым доме ўсе жывуць адной вялікай дружнай сям’ёй, дзеці адчуваюць сябе патрэбнымі і любімымі, неабыякавымі дзяржаве і людзям,”– падкрэсліла Надзея Андрэеўна. Кароткі экскурс па мінулым і цяперашнім прытулка зрабіла дырэктар Святлана Ганчарова.
А ў актавай зале будынка, пад дахам якога суседствуюць дзве структуры, усё было гатова да ўрачыстасцяў. Надзея Ермакова, Святлана Смірнова, Міхаіл Крыштановіч звярнуліся да прысутных з самымі цёплымі словамі і пажаданнямі і асабіста кожнаму ўручылі падарункі. Акрамя таго, шмат сюрпрызаў чакала і ўстановы. Сярод такіх – новенькі тэлевізар, прадукты харчавання, прысмакі. Асаблівым святлом свяціліся дзіцячыя вочы, твары дарослых наведвальнікаў Цэнтра. У сваю чаргу яны і малыя разам з выхавацелямі падрыхтавалі святочны міні-канцэрт і падарункі, зробленыя сваімі рукамі.
Словы ўдзячнасці главе Нацбанка і спонсарам выказаў Аляксандр Шубскі. “Тое, што вы робіце, – адзначыў з усёй шчырасцю старшыня райвыканкама, – не мае кошту і годна самых высокіх слоў падзякі. Нашы дзеці – наша будучае, а сацыяльна неабароненыя людзі, якія маюць патрэбу ў падтрымцы – агульны клопат. І каму, як не нам, прымаць самы непасрэдны ўдзел у іх жыцці. Зразумела, падарункі не заменяць душэўнай пустэчы, але дапамогуць адчуць сябе патрэбнымі грамадству. Нізкі паклон вам, Надзея Андрэеўна, Святлана Юр’еўна, Міхаіл Васільевіч за клопат і неабыякавасць.”