Больш за 20 школьных кірмашоў будуць працаваць сёлета ў раёне. Пра гэта паведаміла першы намеснік старшыні райпа Святлана Бельская. Тавары для вучняў школ і выхаванцаў дзіцячых садоў прапануюць ужо ў спецыяльных пашыраных секцыях крам райцэнтра. З пачатку жніўня актыўна пачнуць працаваць выносныя і выязныя кірмашы, на якіх можна будзе набыць усё неабходнае для дзяцей. Прадстаўленая на іх прадукцыя дазволіць падрыхтаваць да школы і самых маленькіх – першакласнікаў, запэўніла Святлана Арсеньеўна.
– Запасы прадукцыі школьнага асартыменту мы паступова пачалі ствараць загадзя і працягваем сёння.Таму, думаю, дастатковай колькасці адзення дзелавога стылю, абутку, школьных прылад хопіць, каб забяспечыць любы попыт і задаволіць густ самых патрабавальных спажыўцоў – адзначае Святлана Бельская.
Самыя буйныя школьныя кірмашы ў райцэнтры традыцыйна размесцяцца на пляцоўцы каля крамы «Тавары для дома» і на рынку. Тут плануецца прадаваць розныя тавары, неабходныя для падрыхтоўкі да новага навучальнага года: ад канцылярскіх прылад і школьных ранцаў-заплечнікаў да адзення дзелавога стылю і спартыўнага абутку. Графік выязных кірмашоў будзе надрукаваны ў наступных нумарах газеты.
– Святлана Арсеньеўна, зборы дзіцяці ў школу – справа клопатная і затратная. Купля партфеля, канцтавараў, сшыткаў і вучэбнай літаратуры – яшчэ палова справы. Дзіця да верасня трэба апрануць і абуць. А гэта асобны артыкул выдаткаў, і прычым буйных. У колькі абыдзецца абмундзіраванне школьніка? І дзе лепш апранацца?
– Што тычыцца кошту, то набор перша-класніка ў гэтым годзе будзе каштаваць даражэй, чым у мінулым, прыкладна на 15-20 працэнтаў. Год таму набор, у які ўваходзіў касцюм, адна пара абутку, самыя недарагія канцтавары і заплечнік, абыходзіўся пакупніку прыкладна ў 1,5 мільёна рублёў.
Увогуле, кошт школьнай формы залежыць ад памеру, тэкстуры. Набыць рэчы можна як у камплекце касцюма, так і паасобку.
Да прыкладу, класічны школьны касцюм-тройка швейнай фабрыкі «Калінка» абыдзецца бацькам хлопчыка ад 300 да 700 тысяч рублёў.
Юным модніцам школьную форму можна скамплектаваць са спадніцы і пінжака, а можна са штанамі або сукенкай. У сярэднім камплект з трох складнікаў будзе каштаваць ад 300 тысяч да 700.
– Як і класічны мужчынскі касцюм, школьная форма для хлопчыкаў мала схільная да ўплыву моды, – працягвае Святлана Арсеньеўна. – А вось крой і тэкстура адзення для дзяўчынак больш разнастайныя. Іграюць ролю даўжыня і фасон спадніцы, дэталі аздаблення, тканіна і каляровая гама.
Дзе набываць вопратку – справа асабістая, аднак, па словах Святланы Арсеньеўны, рынак – гэта заўсёды рызыка. Паколькі ў выпадку набыцця няякасных рэчаў прад’явіць прэтэнзіі часцяком проста няма каму. Таму набываць тавары для дзяцей лепш за ўсё ў спецыялізаваных крамах. У нашым выпадку гэта другі паверх Гандлёвага цэнтра, крамы «Абутак», «Глобус» у райцэнтры, крамы прамтавараў – на сяле, і, натуральна,школьныя кірмашы.
Асартымент прадстаўленай прадукцыі парадуе разнастайнасцю мадэляў: спаднічкі, сарафаны, пінжакі і штаны рознай тэкстуры і расфарбоўкі. Плюс блузкі, кашулі і аксэсуары на любы густ. Паколькі ў школе свае патрабаванні да адзення вучняў, то і яго колер у большасці сваёй будзе пераважаць стрыманы, няяркі.
Сярод апошніх тэндэнцый – розныя адценні сіняга, бардо. Традыцыйна – чорны і шэры. У крамах райпа будзе прадстаўлена школьная форма айчынных вытворцаў «Вяснянка», «Калінка», «Славянка», «Пан - Мод», ААТ «Жлобінская швейная фабрыка» і іншых. Усё адзенне зручнае, практычнае і бяспечнае для дзяцей.
Святлана Арсеньеўна параіла звяртаць увагу на прадукцыю айчынных вытворцаў. Тым больш што шэрая, безаблічная, «саўдэпаўская» вопратка назаўжды засталася ў мінулым.
– Сёння нашы фабрыкі вырабляюць цалкам канкурэнтназдольную, а галоўнае, прыгожую, практычную і якасную прадукцыю.
Акрамя таго, прадукцыя айчыннага вытворцы заўсёды забяспечана ярлыкамі, на якіх прыведзена першая інфармацыя пра тавар. Перш за ўсё гэта артыкул адзення, яго параметры, фабрыка. Набываючы ж тавар на вулічным прылаўку, звесткі пра яго мы часта можам атрымаць толькі ад шчодрых на хвалу прадаўцоў. Дарэчы, купляючы адзенне і абутак на рынку, зэканоміць шмат не атрымаецца. Улічваючы адсутнасць гарантый якасці, верагоднасць таго, што ваша дзіця шчасна праходзіць у ёй цэлы год, мякка кажучы, малая. Тое ж самае тычыцца і абутку.
У краме восеньскія туфлі беларускай вытворчасці для дзяўчынкі абыдуцца ў сярэднім у 238 тысяч рублёў. Мабыць, і даражэй, чым на рынку, аднак вы будзеце ўпэўнены ў якасці. Тым больш што ў спісе патрабаванняў да школьнай вопраткі на першым месцы стаіць якасць матэрыялу.
Добра, калі і дзіцячы абутак зроблены з натуральных матэрыялаў.Такія туфлі ці чаравікі лепш «дыхаюць», іх бязбоязна можна насіць цэлы дзень.
У выпадку, калі вам усё ж спадабаўся абутак са штучнай скуры, памятайце: сцелька і ўнутранае аздабленне абавязкова павінны быць з натуральных матэрыялаў, а ў цэлым абутак – лёгкім, зручным, з трывалай, гнуткай падэшвай .
Другое і не менш важнае патрабаванне да дзіцячай вопраткі і абутку – поўная адпаведнасць параметрам дзіцяці. Спаднічкі, пінжакі і штаны, не кажучы ўжо пра абутак, не варта купляць на выраст. Пры выбары адзення праверце яе на адсутнасць грубых швоў, вузкіх каўняроў, тугіх паяскоў. Па санітарных правілах пояс павінен абліпаць, але ні ў якім разе не сцягваць. Нельга, каб адзенне скоўвала рух, трэба падбіраць школьную вопратку так, каб дзіцяці ў ёй было зручна і камфортна.
У выпадку, калі абутак цесны ці, наадварот, занадта свабодны, туфлі і красоўкі могуць не толькі выклікаць дыскамфорт, але і дэфармаваць ступню, змяніць хаду і нават негатыўна паўплываць на выправу і пазваночнік. Набываючы рэчы, не забудзьцеся пераканацца ў наяўнасці абавязковага гарантыйнага талона.
Збірайцеся ў школу. Час яшчэ ёсць. Удалых вам пакупак!
