Яшчэ два дзесяцігоддзі назад выраз “паехаць на бульбу” студэнтамі і навучэнцамі ўспрымаўся як закон. Штогод верасень для іх праходзіў пад сцягам уборкі другога хлеба ў саўгасах і калгасах, дзе маладыя людзі не толькі дапамагалі працаўнікам сяла, а і зараблялі годныя грошы,  весела праводзілі вольны час. Гэта аб’ядноўвала і пакідала пасля сябе прыемныя ўспаміны на ўсё жыццё.

Прэзідэнт Рэспублікі Беларусь Аляксандр Лукашэнка, сваім указам №181 ад 16 красавіка 2012 года “Аб арганізацыі  дзейнасці студэнцкіх атрадаў на тэрыторыі Рэспублікі Беларусь”, даў новы імпульс студатрадаўскаму руху, які прыйшоў і на Расоншчыну. Бо менавіта па прынцыпу дзейнасці студэнцкіх атрадаў сёлета арганізаваны ўдзел старшакласнікаў Расонскай і Клясціцкай школ ва ўборцы бульбы ў сельгаспрадпрыемстве “Сяляўшчына”.

Перш, чым накіраваць хлопцаў і дзяўчат на сельгасработы, паміж установамі адукацыі, райкамам БРСМ і сельгаспрадпрыемствам былі заключаны трохбаковыя дагаворы на выкананне работ, у якіх падрабязна прапісаны абавязкі ўсіх бакоў. У адпаведнасці з імі супрацоўнікі райкама БРСМ сфарміравалі 4 атрады па 29 чалавек з вучняў 9-11 класаў Расонскай школы і 2 атрады па  17-18 чалавек з ліку старшакласнікаў Клясціцкай школы. Таксама яны пракантралявалі наяўнасць у кожнага члена атрада медыцынскай даведкі, копіі дакумента, што падцвярджае асобу, пісьмовай згоды бацькоў на ўдзел у сельгасработах і заяву самога вучня. Акрамя таго, райкамам БРСМ і ўстановамі адукацыі распрацавана палажэнне пра правядзенне конкурсу на лепшы студэнцкі атрад, пераможцаў якога чакае заахвочванне. Установы адукацыі адказваюць за замацаванне за кожным атрадам найбольш аўтарытэтных педагогаў, навучанне асновам працоўнага заканадаўства і аховы працы. Кіраўніцтва сельгаспрадпрыемства “Сяляўшчына” афіцыйна аформіла загады на залічэнне ўдзельнікаў атрадаў на працу, пазнаёміла іх з правіламі ўнутранага працоўнага распарадку, вызначыла аўтатранспарт для дастаўкі падлеткаў на месца працы,устанавіла нормы выпрацоўкі, расцэнкі і даўжыню працоўнага дня, які для непаўналетніх складае 4 гадзіны з перапынкам на адпачынак праз кожныя 45 хвілін. Канчатковы разлік з удзельнікамі атрадаў будзе зроблены да канца кастрычніка.  

І вось пачынаючы з 5 верасня штодзень 120 – 130 старшакласнікаў выязджаюць на бульбяныя палі гаспадаркі, агульнай плошчай 65 гектараў. Хлопцы і дзяўчаты падбіраюць бульбу пасля бульбакапалак, вядуць строгі ўлік кожнаму поўнаму вядру, бо інакш вызначыць пераможцаў немагчыма.

На сённяшні дзень у сельгаспрадпрыемстве ўбрана 21 гектар або 32,3 працэнта плошчаў. Ураджайнасць другога хлеба сёлета на парадак вышэй, чым была летась і складае 135, 7 цэнтнера з гектара. Акрамя старшакласнікаў, у “Сяляўшчыну” выязджаюць беспрацоўныя, што стаяць на ўліку ў аддзеле занятасці ўпраўлення па працы, занятасці і сацыяльнай абароне райвыканкама, і прадстаўнікі працоўных калектываў. Агульнымі сіламі бульба павінна быць спарадкавана ўжо да канца будучага тыдня.