Сакавік наяўмольна рухаецца да свайго завяршэння, а разам з ім і перыяд падрыхтоўкі да веснавых палявых работ. Праз лічаныя тыдні на палі выйдзе глебаапрацоўчая і пасяўная тэхніка, каб зрабіць зачын для новага ўраджаю.

Якой для працаўнікоў сяла стане пасяўная 2011 года? У якой ступені гаспадаркі раёна падрыхтаваліся да яе? Пра гэта і іншае наша размова з намеснікам начальніка ўпраўлення сельскай гаспадаркі і харчавання па раслінаводстве Ларысай Міхайлаўнай Мацкевіч.  

– Ларыса Міхайлаўна, чым сёлетняя пасяўная будзе адрознівацца ад пасяўной 2010 года?

– Перш за ўсё  павышэннем на 500 гектараў пасяўных плошчаў. Плануецца пасеяць 1400 гектараў кукурузы ( плюс 300), яравога рапсу – 400 гектараў (плюс 200), пасадзіць бульбы на 150 гектарах, што больш мінулагодняга на 56 гектараў. Прытым гэтай сельскагаспадарчай культурай цяпер будуць займацца не толькі паляводы сельгаспрадпрыемстваў «Сокал» і «Сяляўшчына», але і падсобнай гаспадаркі «Аграсервісу».

Што датычыцца яравога збожжавага кліну, то ён па раёне крыху зменшыцца і складзе 3 500 гектараў. Прычына – павелічэнне леташняй восенню плошчаў, занятых азімымі збожжавымі культурамі. 

– Ці будуць гэтай вясной уводзіцца ў севазварот плошчы, якія ў адпаведнасці з абласной і раённай праграмамі «Чыстыя палі» цяпер актыўна вызваляюцца ад хмызняку і маладых дрэўцаў?

– Безумоўна, але колькі канкрэтна гектараў і ў якіх гаспадарках, пакуль сказаць цяжка. Хутчэй за ўсё гэта будуць плошчы, што раней не выкарыстоўваліся ў сельгаспрадпрыемствах «Дворышча-Рас», «Краснаполе»» і ААТ «Клясціцы». Толькі калі сыйдзе з палёў снег, на гэтую тэму можна будзе пагаварыць больш прадметна і падрабязна.

  – Ёсць чым праводзіць сяўбу?

– Насеннем яравых збожжавых, кукурузы і рапсу гаспадаркі раёна забяспечаны ў поўным аб’ёме. Праўда, застаецца адкрытым пытанне наконт насення бульбы. Для дадатковых 56 гектараў яго пакуль няма, але з дапамогай аблсельгасхарчу ў бліжэйшы час мы вырашым і гэтую праблему.

 – Як складваецца сітуацыя з угнаеннямі?

– Іх сёлета ўжо цяпер назапашана на 60 працэнтаў больш леташняга. Больш, чым летась, вывезена на палі і арганічных угнаенняў.
 
–Наколькі эфектыўна папрацавалі інжынерныя службы і механізатары гаспадарак па падрыхтоўцы тэхнікі?

– Каб не быць галаслоўнай, назаву наступныя лічбы. На сённяшні дзень гатовы выйсці ў поле 29 з 32 плугоў, 14 з 15 культыватараў, 118 са 127 трактароў ( з іх 21 энерганасычаны), 17 з 22 камбінаваных глебаапрацоўчых пасяўных агрэгатаў. Агульны працэнт гатоўнасці тэхнікі набліжаецца да 92. Але і астатнія адзінкі да пачатку веснавых работ будуць стаяць на лінейцы гатоўнасці.

– Невыпадкова кажуць, што чалавечы фактар у любой сітуацыі або справе  з’яўляецца вырашальным.  Думаю, сельскагаспадарчая галіна таксама не выключэнне з правіла? 

– Нават больш скажу: чалавечы фактар у сельскай гаспадарцы – самы галоўны. Таму з боку кіраўніцтва райвыканкама шмат  увагі надаецца забеспячэнню гаспадарак раёна кадрамі механізатараў. За кожным трактарам, які выйдзе сёлета ў поле, замацаваны чалавек, а на энерганасычаных трактарах «МТЗ-30.22» – па двое, таму яны будуць працаваць у дзве змены на працягу  22 гадзін у суткі. Менавіта такую задачу паставіў перад намі Міністр сельскай гаспадаркі і харчавання Рэспублікі Беларусь Міхаіл Русы.

А каб адчуваць сябе больш упэўнена, 11 механізатараў раёна на мінулым тыдні прайшлі стажыроўку на Мінскім трактарным заводзе, дзе азнаёміліся з тонкасцямі працы і магчымасцямі энерганасычаных трактароў. Праводзілася вучоба для механізатараў і на базе вучэбнага камбіната. Таму збояў павінна быць па мінімуме.

Акрамя таго, на пасяўной будуць задзейнічаны і шэфы з арга-нізацый і прадпрыемстваў райцэнтра і горада Наваполацка. Думаю, агульнымі сіламі мы закончым веснавыя пасяўныя работы ў вызначаныя тэрміны.

– Агучце іх.

–  На яравым збожжавым кліне сяўба павінна быць праведзена на працягу двух тыдняў да 1 мая. Да 9 мая плануецца завяршыць сяўбу іншых сельскагаспадарчых культур.

– Справіцеся?
–  У нас няма выбару. Калі спазнімся, страцім частку будучага ўраджаю.Таму абавязаны паспець.