На мінулым тыдні Расоншчына прымала гасцей з Карсаўскага Краявога Самакіравання  Латвійскай Рэспублікі. Дэлегацыя з чатырох чалавек на чале са старшынёй Карсаўскай краявой думы Інарай Сіліцка завітала да нас, каб пазнаёміцца з рэгіёнам і падпісаць дагавор аб супрацоўніцтве.
Пачатак узаемавыгадным і суседскім адносінам на міжрэгіянальным узроўні быў пакладзены ў лютым 2010 года ў час правядзення  чарговага інвестыцыйнага форуму ў Віцебску, на якім некалькіх сваіх праектаў прадстаўляў і Расонскі раён. Вось тады ад Генеральнага консульства Рэспублікі Беларусь у Даўгапілсе і паступіла прапанова аб усталяванні сяброўскіх сувязяў і супрацоўніцтве паміж Карсаўскай краявой думай і Расоншчынай, якую адразу ж і падтрымаў раённы выканаўчы камітэт.
І вось 6 ліпеня па запрашэнні беларускага боку латышская дэлегацыя прыехала ў наш раён. Яе сустракалі старшыня раённага Савета дэпутатаў Генадзь Акімавіч Фёдараў, намеснікі старшыні райвыканкама Аляксандр Георгіевіч Капшуль і Галіна Аляксееўна Падвіцельская. Як шчырыя гаспадары яны прапанавалі  латышскім гасцям азнаёміцца з некаторымі аб’ектамі сацыяльнай сферы і прадпрымальніцтва. Так, Інара Сіліцка, яе намеснік Петэрыс Лаганоўскіс, кіраўнік камітэта Карсаўскай краявой думы Юрыс Пойканс і каардынатар па грамадскіх сувязях Сандра Чайране пабывалі ў Тэрытарыяльным цэнтры сацыяльнага абслугоўвання насельніцтва, у дзіцячым сацыяльным прытулку, пазнаёміліся з прыватнымі прадпрыемствамі «Эфект» і «Уладзімір і Даніла», з экспазіцыяй музея баявой садружнасці. Латышы не проста гля дзелі і слухалі, а задавалі шматлікія пытанні, нешта адзначалі для сябе, іншы раз здзіўляліся. А вечарам на янкавіцкай зямлі іх чакала народнае свята Купалле з традыцыйнымі скокамі праз вогнішча і мясцовымі песнямі.
Раніцай  другога дня  ў кабінеце старшыні раённага выканаўчага камітэта і адбылося падпісанне дагавору паміж Расонскім райвыканкамам і Карсаўскім Краявым Самакіраваннем. Пад ім свае подпісы паставілі Аляксандр Мікалаевіч Шубскі і Інара Сіліцка. У адпаведнасці з дагаворам бакі ў межах сваёй кампетэнцыі абязуюцца развіваць і будаваць двухбаковыя адносіны на аснове даверу, узаемнай павагі, раўнапраўя і партнёрства; здзяйсняць супрацоўніцтва ў абласцях эканомікі, адукацыі, культуры, спорту, турызму, сацыяльнай сферы і аховы навакольнага асяроддзя.Плануецца правядзенне сумесных мерапрыемстваў, аказанне падтрымкі ініцыятывам па ўсталяванні кантактаў паміж прадпрымальніцкімі структурамі, арганізацыя сумесных вытворчасцяў і прадпрыемстваў, абмен вопытам па ўкараненню новых тэхналогій па розных накірунках.
Аднак усё вышэйпералічанае пакуль яшчэ ў будучым. Бліжэйшая сустрэча двух бакоў плануецца на канец жніўня ўжо на латышскай зямлі. Расонская дэлегацыя ў час візіту  бліжэй пазнаёміцца з Карсаўскім Краем, пасля чаго дагавор атрымае больш канкрэтныя абрысы.