Правядзенне Дня інвалідаў Рэспублікі Беларусь  накіравана на прыцягненне ўвагі да праблем  людзей  з абмежаванымі  магчымасцямі, абарону іх годнасці і правоў. Традыцыйная сустрэча  з  нагоды гэтага дня адбылася ў мінулую  пятніцу на  базе ТЦ САН.

Яе адкрыла  дырэктар  установы  Ганна  Ясінская, якая  шчыра  павітала тых, хто прыйшоў, і расказала, што робіцца ў раёне   для  падтрымкі інвалідаў.

«Паважаныя ветэраны, сталыя  людзі! Я рада вітаць вас  на нашай сустрэчы, сэнс якой –  зрабіць яшчэ адзін крок насустрач вам, – адзначыла начальнік упраўлення па працы, занятасці і сацыяльнай абароне райвыканкама Алена  Саўчанка.  – З  боку  дзяржавы ро-біцца  ўсё, каб  падтрымаць вас у складанай жыццёвай сітуацыі, бо мы зацікаўлены ў кожным грамадзяніне нашага  раёна, у яго здароўі. На Расоншчыне  засталося не  так многа  доўгажыхароў, таму  хацелася  б,  каб вы  жылі як  мага  больш»
.
Яшчэ Алена Міхайлаўна   абвясціла  навіну  пра  адкрыццё на базе ТЦ САН новага  аддзялення  інфармацыі, прагнозу і аналізу,  што размесціцца па вуліцы Савецкая, № 15.  Аддзяленне будзе працаваць  па  пярвічным  узроўні  са  сталымі і  інвалідамі.
Дарэчы,  з  іх  пачала  сваю  размову  з  гасцямі і старшыня раённай ветэранскай арганізацыі Іна  Павядайла:

–Я рада, што  вы  сёння ў  добрым  здароўі, выдатна  выглядаеце, усміхаецеся, што вы прыйшлі  сюды , дзе  можаце  сустрэцца, пагутарыць. Я  жадаю вам доўгіх  гадоў  жыцця, увагі  і клопату ад службаў,  дзяцей, родных і  блізкіх, і хай  кожны  новы  дзень прыносіць толькі  радасць.

Апошнім  слова  трымаў  старшыня  раённага Савета  дэпутатаў Генадзь Фёдараў. Ён  азнаёміў   прысутных з вынікамі  апошняй пяцігодкі,  расказаў пра надыходзячы  IV Усебеларускі  народны  сход,   эканамічнае  развіццё  раёна, закрануў пытанні  дэмаграфіі, заработнай  платы і пенсіі, запрасіў  на  выбары Прэзідэнта Рэспублікі Беларусь. А  напрыканцы  дадаў:

–Хачу  пажадаць  доўгага  жыцця, дабрабыту, спакою  ў сем’ях.
Затым  кожнаму госцю  былі  ўручаны  памятныя  падарункі, а разам з імі выдатныя песні ў выкананні  хору ветэранаў, салістаў  РДК і  эстраднай  студыі  “Надзея”.
         
На здымку: (злева направа) Агаф’я Дзмітрыеўна Урбан, Марыя Сідараўна Іванова.
                     Фота аўтара.