Расонскі раённы вузел паштовай сувязі з’яўляецца неад’емнай часткай эканамічнага, палітычнага і культурнага жыцця раёна.З кожным годам сучасныя тэхналогіі паляпшаюць якасць і разнастайнасць паслуг раённага вузла электрычнай сувязі, але галоўным рэсурсам і падмуркам у дзейнасці арганізацыі з’яўляюцца людзі, адданыя сваёй справе. Да такіх, без перабольшвання, можна аднесці кабельшчыка-спайшчыка 5 разрада лінейна-тэхнічнага ўчастка Дзмітрыя Мікалаевіча Зуева, які абслугоўвае зону Клясціцкага сельскага Савета.
Дзмітрый на сваім участку забяспечвае бесперабойнае карыстанне тэлефоннай сувяззю, інтэрнэтам, інтэрактыўным тэлебачаннем. А калі ўзнікаюць якія-небудзь праблемы з сувяззю, то Дзмітрый садзіцца на свайго жалезнага каня і спяшаецца вырашыць непаладкі. Калі з рыдлёўкай, калі з больш далікатным інструментам, але заўсёды ён дасягае пастаўленых задач.
Спакойны, упэўнены ў сваіх магчымасцях і заўсёды лёгкі на пад’ём, мужчына без дадатковых слоў і маркоты бярэцца за справу.
За прафесіяналізм і адказнасць у выкананні заданняў Дзмітрый Мікалаевіч карыстаецца заслужанымі павагай і аўтарытэтам у калег і кіраўніцтва. Яго дысцыплінаванасць, арганізатарскі талент, высокая працаздольнасць, а таксама беражлівыя і эканомныя адносіны да матэрыяльных рэсурсаў выгадна вылучаюць яго сярод іншых работнікаў. Спраўляецца Дзмітрый і з даводзімымі планамі.
Так, вынікі яго дзейнасці за мінулы год кажуць самі за сябе: яны дазволілі супрацоўніку Расонскага РВЭС стаць лепшым сярод лепшых, бо менавіта з 2010 года фота Д. Зуева размешчана на Дошцы гонару Віцебскага філіяла РУП “Белтэлекам”.
У дзень нашай сустрэчы Дзмітрый Мікалаевіч наладжваў селектарную сувязь у сельгаспрадпрыемстве “Сокал”, таму адцягнуць яго ад важнай справы мне ўдалося хвілін якіх на дзесяць. Усмешлівы, памяркоўны і нешматслоўны, гэты мужчына выклікае давер. Дзмітрый расказаў, што родам ён з Клясціц.
І хаця ў свой час паспрабаваў гарадскога жыцця, зусім не шкадуе, што вярнуўся на родную зямлю. Спецыяльнай адукацыі не атрымаў, але са сваімі абавязкамі спраўляецца выдатна. Трынаццаць жа год плённай дзейнасці ў электрычнай сувязі – гэта тэрмін. У сваёй працы Дзітрыю падабаецца пастаянная запатрабаванасць людзей у яго ўменнях, ён лічыць, што здольнасць дапамагчы камусьці – вельмі важна для кожнага з нас.
Прыемна, што і сын Арцём з лёгкай рукі бацькі ўжо цікавіцца тэхнікай, любіць паездзіць з кабельшчыкам па праблемных аб’ектах. Хто ведае, можа, і з Арцёма вырасце сувязіст?
Пажадаем Дзмітрыю Мікалаевічу поспехаў у любімай справе, а ўсім супрацоўнікам
Расонскага РВЭС напярэдадні прафесійнага свята моцнага здароўя, новых здабыткаў і дабрабыту ў іх сем’ях. Для нас, карыстальнікаў паслуг электрычнай сувязі, вельмі важна, каб яны заўсёды ішлі насустрач не толькі станоўчым пераменам тэхнічнага прагрэсу, але і сваім кліентам! Са святам!
