19 красавіка адбылося чарговае пасяджэнне раённага штаба па добраўпарадкаванні, на якім прысутнічаў старшыня  райвыканкама Аляксандр Шубскі.
На пасяджэнні  былі разгледжаны пытанні аб  прынятых  мерах  па навядзенні парадку на тэрыторыях паказальных аб’ектаў райцэнтра –  цэнтральнай кацельнай УП ЖКГ, вытворчых базах ПВГП “ Уладзімір і Даніла” і ПУП «Эфект».

Членамі камісіі было адзначана, што найбольш актыўна працуе ў гэтым напрамку жыллёва-камунальная гаспадарка. Перад ЖКГ яшчэ стаяць пытанні па выяўленні і ліквідацыі найбольш набалелых камунальных праблем, што хвалююць людзей: падсыпка і рамонт дарог, наяўнасць бакаў для смецця і іншыя. Натуральна, прыступілі да добраўпарадкавання  і два астатніх  прадпрыемствы, аднак самы вялікі аб’ём работ застаецца за ПУП   «Эфект».

Як спрацуе прадпрыемства па гэтым пытанні,  пракантралююць Цэнтр гігіены і эпідэміялогіі, службы РАНС і  аховы прыроднага і расліннага свету.

Шмат увагі старшыня райвыканкама надаў і другому пытанню – працы міжведамаснай групы па навядзенні парадку, санітарнай ачыстцы, азеляненні пасёлка. Менавіта таму на пасяджэнне былі запрошаны начальнікі чатырох  рабочых груп: Аляксандр Герасіменка, Віталь Гарбачонак, Аляксандр Пятровіч, Іван Тысянчук.

 Кіраўнікі  трымалі справаздачу пра зробленыя справы, а гэта – абход кожнай вуліцы, агляд прыдамавой тэрыторыі і выяўленне праблемных сітуацый, складанне актаў адносна  дрэнных гаспадароў. Гэтым групам даведзена  заданне дайсці да кожнага чалавека і растлумачыць, што і як трэба выправіць: пафарбаваць альбо зрабіць  рамонт фасада дома, навесці парадак.

 На пасяджэнні падкрэслілі, што праца з людзьмі павінна быць праведзена да 28 красавіка. І калі людзі і камісія не дамовяцца, неразуменне будзе вырашацца з дапамогай адміністрацыйных пратаколаў.

Закранулі на пасяджэнні і жыццё вяскоўцаў. У прыватнасці, Аляксандр Шубскі завастрыў увагу на тым, каб  правесці размову са старэйшынамі вёсак і  даведацца пра  пажаданні, скаргі сяльчан. 

На асабісты  кантроль старшыні раённага Савета дэпутатаў Генадзя Фёдарава і начальніка аддзела ЖКГ райвыканкама  Вацлава Зялёнкі будзе  ўзята  пытанне правядзення прадпрыемствамі і арганізацыямі чыстых чацвяргоў.

 Удзельнікі пасяджэння прыйшлі і  да кансенсусу па  ўчастках зямлі, што самавольна апрацоўваюцца каля шматкватэрных дамоў. Калі людзі жадаюць іх засаджваць, ніхто не будзе супраць, толькі трэба прывесці  іх у належны стан:  навесці парадак, адрамантаваць агароджу. Калі гэтага не будзе, то іх  ліквідуюць.