Каб атрымаць спецыяльнасць агранома і стаць сапраўды высокакваліфікаваным прафесіяналам, мала адных тэарэтычных ведаў. Як правіла, ва ўстановы адукацыі сельскагаспадарчага профілю ідуць тыя маладыя людзі, хто сапраўды любіць вырошчваць расліны і мае схільнасць да земляробства. Менавіта да іх адносіўся і галоўны аграном сельгаспрадпрыемства “Сяляўшчына” Барыс Генадзьевіч Іваноў (на здымку).

Выбар будучай прафесіі для выпускніка Расонскай школы 1979 года Барыса Іванова быў відавочны. Яго бацькі ўсё жыццё адпрацавалі ў раслінаводстве  калгасаў “Расоны” і “Новы свет”. Іх сын пайшоў далей, вырашыўшы працягнуць сямейную дынастыю, праўда, ужо не ў якасці палявода, а вучонага агранома. Таму і паступіў у Себежскі сельскагаспадарчы тэхнікум. Адразу пасля яго заканчэння Барыс Генадзьевіч служыў у радах Савецкай Арміі і толькі потым уладкаваўся ў калгас “Новы свет” брыгадзірам трактарнай брыгады. Але ж малады спецыяліст марыў пра атрыманне вышэйшай адукацыі. Таму наступнай прыступкай у яго станаўленні, як агранома, стала вучоба на завочным аддзяленні  Вялікалуцкай дзяржаўнай сельскагаспадарчай акадэміі.  Прайшло тры гады, які Барыс Генадзьевіч атрымаў дыплом, і тады яму прапанавалі ўзначаліць агранамічную службу калгаса “Новы свет”. І вось ужо чатырнаццаць гадоў ён працуе на адказнай пасадзе.

Слова “аграном” у старажытных грэкаў азначала “той, хто наводзіць парадак на полі”. Таму невыпадкова ў кола абавязкаў агранома ўваходзіць кампетэнтная арганізацыя працы работнікаў, планаванне і кантроль за правядзеннем усіх палявых работ. Аднак яго штодзённыя клопаты не абмяжоўваюцца непасрэднай працай на полі. Спецыяліст з вышэйшай адукацыяй, ён, абапіраецца  на ўласныя веды, распрацоўвае агратэхнічныя кампаніі і мерапрыемствы, якія накіраваны на барацьбу з хваробамі і шкоднікамі, паляпшэнне ўрадлівасці глебы,  догляд пасеваў.

Канчатковым вынікам працы агранома з’яўляецца атрыманы ўраджай. Сёлетні ўраджай збожжавых і зернебабовых парадаваў Барыса  Генадзьевіча. Сельгаспрадпрыемства “Сяляўшчына” намалаціла 4 059 тон, што на 38 працэнтаў больш мінулагодняга. І гэта самы значны паказчык па раёне, таксама, як і ўраджайнасць збожжавых і зернебабовых культур, якая склала 27 цэнтнераў з гектара . Нядрэннай у сяляўшчынцаў урадзілася і бульба, ураджайнасць якой каля 120 цэнтнераў з гектара. Амаль у два разы больш, чым летась.

На пытанне: “У чым сакрэт сёлетняй паспяховай працы?”, Барыс Генадзьевіч адказаў: “Асабліва ніякіх сакрэтаў няма. Проста надвор’е сёлета спрыяла добраму ўраджаю, ды і атрымалася аптымальна падабраць папярэднікі збожжавых культур”.
 А яшчэ трэба дадаць: плюс кампетэнтнасць і працавітасць работнікаў гаспадаркі, у тым ліку і галоўнага агранома Барыса Генадзьевіча Іванова.