Цяжка пераацаніць значэнне той ролі, якую адыграла для гісторыі чалавецтва нараджэнне Езуса з Назарэта. Прыход  Хрыста ў свет стаў лёсавызначальным для ўсёй зямной цывілізацыі.


 
– Сапраўды гэта так. І  пра гэта можам сцвярджаць, не толькі таму, што чалавецтва нават гісторыю і час прызвычаілася ўмоўна дзяліць на два перыяды: да нараджэння  і пасля нараджэння Хрыста. З  кожным разам  людзі з  радасцю чакаюць, калі дадасца яшчэ адзін чарговы новы год Хрыстовай эры, – гаворыць пробашч рымска-каталіцкай парафіі  святога Язафата Кунцэвіча ў Расонах  ксёндз Вячаслаў.

– Нараджэнне Езуса стала важнай падзеяй, дзякуючы таму, што Езус быў не толькі чалавекам, ён быў Богам. Яго   прыход у наш зямны свет гэта штосьці абсалютна новае. Прарок Ісая ў Старым Запавеце Святога Пісання нараджэнне Езуса параўновае са святлом, што праганяе цемру, бо піша: “Народ, які хадзіў у цемры, убачыў святло вялікае, над жыхарамі краіны змроку заззяла святло…”.

І сапраўды,так яно і ёсць. Жыццё чалавека без Бога – гэта жыццё ў цемры, яно не мае ні сэнсу, ні смаку. Жыццё з Богам  – гэта жыццё ў якім ёсць шчасце і непахісная надзея. Чаму так? Таму што  дзе ёсць Бог, там ёсць і хрысціянскія каштоўнасці: любоў, свабода, праўда і справядлівасць. Чалавек не можа быць шчаслівым, жывучы без любові ў падмане. Але ж ці гэта магчыма жыць і кіравацца такімі завысокімі прынцыпамі зямному чалавеку? Напэўна, хацелі б спытаць тыя, хто ўсё сваё жыццё рос  на іншых каштоўнасцях, думаючы пра зямныя багацці, пра славу, кар’еру ці яшчэ пра якія-небудзь  іншыя спакусы, якія на столькі нетрывалыя, што можна параўнаць іх з травой, што ў адзін момант з сакавіта-зялёнай робіцца пажоўклай.

Гэта ўжо справа веры. Кожны сам выбірае, як яму жыць.  Гістарачны досвед чалавецтва паказвае, што нікому дагэтуль не ўдалося збудаваць трывалы жыццёвы лад без духоўных каштоўнасцяў. У розныя часы людзі жылі па-рознаму.  Часам цэлым народам здавалася, што яны збудуюць,  так званае, “новае жыццё” на “новых ідэалах”. Аднак  заўсёды там, дзе забываліся пра  мараль чалавека, пабудаваныя сістэмы станавіліся  бязбожнымі.  І людзі ўрэшце рэшт заставаліся ні з чым...

З другога боку,  Сын Божы, які становіцца чалавекам, сваім зямным жыццём пераконвае кожнага з  людзей, што яго шлях –  гэта адзіная дарога, на якой чалавек не згубіць сваю чалавечнасць, але спазнае  яе паўнату стаўшыся дзіцём Божым. Езус салідарны з чалавекам, які ў сваім жыцці ідзе наперад на Божае святло. І такі чалавек ужо не будзе самотны ў свеце, бо Сын Божы ідзе побач з ім. Такому чалавеку не трэба апасацца, што ён заблукае ў жыцці, саб’ецца з дарогі і пачне хадзіць кругамі, па сцежках якія сам пратаптаў у цемры.

Шаноўныя, кожны з нас сам вызначае якія святы святкаваць. Нараджэнне  Хрыстова – гэта свята для тых, хто не спыніўся ў пошуках узвышанага, добрага і вечнага. Я віншую усіх Вас са святам Божага Нараджэння. Няхай Бог Любові і Супакою будзе заўсёды з вамі. Жадаю Вам не губляць надзеі.  Чалавек, які мае веру, добра ведае, што як бы ні былі складанымі жыццёвыя  пошукі, яны непазбежна закончацца паспяхова. Няхай святло, якое прыносіць Хрыстос у гэты свет, вядзе Вас наперад, да лепшага жыцця.

Запрашаю з нагоды святкавання Калядаў прыняць удзел ва ўрачыстых малітвах 24 снежня а 22-ой гадзіне ўвечары, і 25 снежня а 9-ай гадзіне раніцай.