«Ну вось, прыехалі дзяўчаты – і надвор’е адразу сапсавалася,»– усміхнуўся вадзіцель Пётр Мікалаевіч Малахаў,  калі я разам з начальнікам аддзела па справах моладзі райвыканкама Наталляй Дзедзінец і першым сакратаром райкама БРСМ Аленай Герасімавай выйшла з рэдакцыйнай машыны бліз урочышча Сяргеева. Менавіта тут у мінулую пятніцу на ўсю моц  ішла сяўба аўсу.
 І сапраўды, калі дагэтуль свяціла сонейка, то пасля паўдня неба зацягнулася хмарамі, разгуляўся вецер. «Нічога, добрым механізатарам дрэннае надвор’е не перашкода, –  назіраючы за работай «МТЗ-12-21», які рухаўся па полі з пасяўным агрэгатам “Лемкен”, устаў на нашу абарону замацаваны за сельгаскааператывам “Клясціцы” Віктар Міхайлавіч Янчулоў. – Таму няма сумненняў, бо за “баранкай” Аляксандр Уладзіміравіч Гуляй (на здымку справа)–   адзін з лепшых механізатараў гаспадаркі са стажам больш за 20 год».
Пётр Мікалаевіч, супрацоўнік Клясціцкага лясніцтва, на «МТЗ -82» не першы год заняты ў якасці шэфа на падвозцы зерня. Ён  толькі што разгрузіўся і таксама сачыў за працэсам. Галоўнаму аграному гаспадаркі Кацярыне Шаболтас, якая працуе на адказнай пасадзе толькі другі год,  было не да гутарак: яе постаць мы бачылі то блізка, то  на супрацьлеглым канцы ўрочышча плошчай у 30 гектараў – дзяўчына ўважлівым вокам наглядала, як праводзіцца сяўба.  
У другой частцы ўрочышча  на падрыхтоўцы глебы быў заняты «МТЗ-28-30» з культыватарам, якім кіраваў малады механізатар Валерый Круглікаў.  Сёлетняя пасяўная кампанія  –  яго «баявое хрышчэнне» ў ролі механізатара. Працай Валерыя  і яшчэ аднаго маладога механізатара на «МТЗ-30-22» з чызелем Юрыя Зуева, іх жыццём і планамі на будучае цікавіліся Наталля Дзедзінец і Алена Герасімава.
Не адставаў ад астатніх  і малады сеяльшчык Дзяніс Пятроў (на здымку злева): ён працаваў на падмене – збожжа своечасова падрыхтоўвалася і засыпалася. Па словах  хлопца, моладзі ў роднай гаспадарцы ёсць у каго пераймаць вопыт і з каго браць прыклад. Вопытнае  пакаленне механізатараў з задавальненнем  дзеліцца навыкамі і ведамі з пачынаючымі, дапамагае і справамі, і словамі.
Як расказаў кіраўнік сельгаскааператыва С.Ф. Пакатаў, уся тэхніка, што задзейнічана на веснавых палявых работах, на полі: уздымае і апрацоўвае глебу, уносіць у яе мінеральныя ўгнаенні, выконвае іншыя неадкладныя работы.  У цэлым сяўбу клясціцкія хлебаробы намераны завяршыць да першамайскіх святаў. На ўчарашні дзень было пасеяна 197 гектараў яравых, што складае 28,6 працэнта да плану, у тым ліку яравых збожжавых – 37,2 працэнта. На 200 гектарах вядзецца падсеў траў з перазалужэннем палепшаных лугапашавых угоддзяў. Трэба яшчэ пасеяць 40 гектараў яравога рапсу і 120 гектараў кукурузы. Усяго ж яравы клін у гаспадарцы зойме 690 гектараў.
      Вольга ЛЕБЕДЗЕВА. Фота аўтара.