У гаспадарках раёна ідзе масавая, нялёгкая ў спякоту нарыхтоўка кармоў. На сённяшні дзень гэта галоўны клопат сяльгаспрадпрыемстваў – ад добрай кармавой базы напрамую залежыць вытворчасць мяса і малака.
Дарагі кожны дзень, кожная гадзіна, калі няма дажджу. У такі час усе ў полі: і механізатары, і аграномы, і кіраўнікі.
На сённяшні дзень лідэр у нарыхтоўцы кармоў – сельгаспрадпрыемства «Дворышча-Рас», якое ўзначальвае Мікалай Муравейка. Тут нарыхтавана 47 тон сена і 2 310 тон сенажу, што складае 7,17 цэнтнераў кармавых адзінак на адну фуражную карову, у той час як у сярэднім па раёне гэты паказчык складае 3,15 цэнтнераў. Другая пазіцыя ў сельгаспрадпрыемства ААА «Расонскі аграсервіс», на трэцім месцы КУСХП «Краснаполле».
У мінулым годзе на канец мая і пачатак чэрвеня ў “ДворышчыРас” у траншэі было выкладзена 1759 тон сенажу. У бягучым годзе на аналагічны перыяд амаль удвая больш.
– Гэта менавіта тыя віды кармоў, ад багацця якіх залежыць малочная прадуктыўнасць жывёлы. Пытанне вытворчасці кармоў для жывёлаводаў сельгаспрадпрыемства – адно з галоўных, – кажа яго кіраўнік Мікалай Муравейка.
Асновай рацыёну жывёл з’яўляюцца грубыя кармы, а для малочнага статку – сянаж і сілас. Па пажыўнасці тры кілаграмы сена раўняюцца аднаму кілаграму зерня. На сённяшні дзень з улікам пасеваў бягучага года мы ўжо маем больш 693 гектары лугавых траў. Гэта з’яўляецца галоўнай апорай і надзеяй паспяховай нарыхтоўкі кармоў. З
кожнага гектара пасеваў мы штогод атрымліваем 2 укосы высокабялковых кармоў..
….Касілка ідзе па полі на такой прыстойнай хуткасці, што наш аўтамабіль па прасёлкавай дарозе не адразу змог і дагнаць яе. Агрэгат раптам спыніўся:трэба было нешта адрамантаваць у жатцы. І пакуль механізатар займаецца паломкай, мне хоць і некалькі хвілін, але ўдаецца пагаварыць з ім.
Анатоль Голубеў у полі другі тыдзень. На касілцы “КПР- 9” – трэці сезон. У гаспадарцы – больш за 30 гадоў. Практычна заўсёды –ў лідэрах. У мінулым годзе поспех хлебароба (па выніках спаборніцтваў сярод камбайнераў) быў адзначаны каштоўным падарункам – тэлевізарам. Яно і зразумела: праца для механізатара амаль звыш усяго. Пасяўная – касавіца– уборачная і зноў пасяўная. Адпачынак толькі зімой.
– Што можа быць лепш, чым праца на родных палях. Праўда, заробак мог быць і лепей, а то ледзь сонца ў небе – я ў полі, і да цёмнага. Аднак рады, што мая праца на карысць. Якая колькасць грубых і сакавітых кармоў патрабуецца для таго, каб забяспечыць найвышэйшую мясную і малочную прадуктыўнасць жывёлы, не ведаю.
Аднак ўпэўнены ў адным: чым больш якаснымі будуць кармы, тым прадуктыўней будзе жывёла і суадносна добрай прадукцыя. І не адны кіраўнікі гаспадарак, але і радавыя жывёлаводы ведаюць, што немагчыма павялічыць надоі малака без скормлівання жывёлам сакавітых кармоў. Вось для закладкі сіласу будзем выкарыстоўваць не толькі магчымасці палёў, але і пасевы кукурузы. Гатункі кукурузы даюць з гектара багата тон зялёнай масы…
Адцягваць механізатара ад працы нельга: да абеда яму трэба скасіць не адзін гектар. Таму жадаю паспяховага працоўнага дня. Дарэчы, абед у поле прывозяць своечасова, два разы ў дзень, і заўсёды ежа гарачая. Гэта дадае сілы, і механізатар страецца ўдвая больш. Анатоль Голубеў ужо скасіў звыш 100 гектраў траў.
