Дзіцячая творчасць, як правіла, адрозніваецца шчырасцю і чысцінёй. У гэтым можна было пераканацца, наведаўшы раённы этап рэспубліканскай выставы дэкаратыўна-прыкладной творчасці «Вясёлы карагод», што прайшоў на базе Расонскай школы.
На думку педагогаў, уключэнне дзяцей у  розныя віды мастацкай дзейнасці – адна з галоўных умоў паўнацэннага эстэтычнага выхавання  асобы і развіцця ўмення творча працаваць. Магчыма таму актыўнымі ўдзельнікамі  выставы сталі дзеці і падлеткі, якія наведваюць заняткі на пунктах карэкцыйна-педагагічнай дапамогі пры дашкольных установах і школах раёна або вучацца ў класах інтэгрыраванага навучання і выхавання.
 Сярод творчых работ у наведвальнікаў асаблівы інтарэс выклікала аплікацыя «Снегіры» з элементамі аб’ёмнага дэкора ў выкананні Аляксандра Марозава і Яўгена Рубіса з яслі-сада №4, камбініраваная работа «Мой дом» з выкарыстаннем экалагічнага і прыкладнога матэрыялу ў выкананні Іллі Караткевіча з Клясціцкай школы. На выставе вучнямі Сакалішчанскай школы быў прадстаўлены яшчэ адзін від дэкаратыўна- прыкладной творчасці  – «разьба па дрэве».
Як бачна, дзіцячай творчасці няма межаў.                          Ірына ГАРЭЛІКАВА.