Напэўна, самая значная падзея  для вучня – развітанне са школай, нават калі гэта школа мастацтваў.  Бо пасля яе заканчэння ў кожнага пачынаецца іншае  жыццё, па ўласным сцэнарыі. І няхай у такіх школах звычайна не робяць асобна апошняга званка затое  ў святочнай, цёплай атмасферы  віншуюць выпускнікоў, урачыста  ўручаюць пасведчанні  аб заканчэнні, граматы, рыхтуюць святочную праграму, дораць песні, музыку і  добры настрой.
Вось і ў мінулым месяц май – месяц развітання  са школай, якую  большасць выпускнікоў будзе прыгадваць усё сваё жыццё. З гэтай  нагоды ў актавай зале райвыканкама адбыўся выніковы канцэрт школы  мастацтваў і ўручэнне пасведчанняў аб яе заканчэнні.
...Прыгожа апранутыя, крыху ўсхваляваныя, з кветкамі, выхаванцы спяшаліся на ўручэнне. Бо гэта  першы  ў іх жыцці дакумент аб атрыманні  музычнай адукацыі. Прыгадайце сябе і згадзіцеся: ёсць падстава для хвалявання. Тым больш што выпускнікоў віншавалі іх любімыя педагогі, бацькі, першакласнікі  ўстановы. Было шмат цёплых слоў, кветак і  слёз развітання.
 – Хай збудуцца вашыя  мары, – жадалі вядучыя Аксана Лавецкая і Віталь Рубіс, – радуйце нас сваёй  творчасцю, а мы ў сваю чаргу гатовы   заўсёды вас падтрымаць.
…Віншаванні змяняліся выступленнямі навучэнцаў і выпускнікоў. Доўга  апладзіравалі аркестру педагогаў, які сёння з’яўляецца ўпрыгожаннем многіх канцэртаў і мерапрыемстваў.
На сцэну выходзілі выпускнікі  харэаграфічнага, музычнага, мастацкага аддзяленняў. І вось настаў самы  ўрачысты і доўгачаканы момант: уручэнне пасведчанняў. На сцэну ўзняліся 27 выпускнікоў. 
Дырэктар школы Алена Парфёнава кожнаму ўручала дакумент, жадаючы быць упэўненымі, настойлівымі, актыўнымі. Жадала таксама поспеху ў  далейшым навучанні. Пры гэтым   асобна адзначыла самых яркіх выдатнікаў-выпускнікоў. Гэта музыканты – Уладзіслава Мядзведзева (фартэпіяна), Алена Малашэнка; харэографы – Дзмітрый Паўлаў, Маргарыта Вашкевіч , Юлія Дзялец, Аляксандр Амосаў; мастакі – Дзіяна Адахоўская, Вікторыя Стаўпец, Наталля Хамянок.
Акрамя пасведчанняў, выдатнікам, самым таленавітым дзецям былі ўручаны граматы  за актыўны ўдзел у творчым жыцці, старанне вучыцца. Усіх выпускнікоў сустракалі і праводзілі са сцэны апладысментамі і пажаданнямі: “Ідзіце  далей!” Мажліва, для кагосьці творчасць сапраўды стане прафесіяй, і апладысменты для іх будуць гучаць яшчэ сотні тысяч разоў. А хтосьці проста пранясе праз гады  любоў  да  мастацтва, дзелячыся сваім душэўным  багаццем з іншымі…