45 маладых спецыялістаў   з багажом сучасных ведаў і планамі на будучае сёлета  прыехалі на Расоншчыну.  Хтосьці – па закліку сэрца. А хтосьці – па размеркаванні. Так ці інакш, але кожнаму з іх, асабліва цяпер, патрэбны падтрымка, разуменне, увага.

Менавіта таму і адбылася на гэтым тыдні ўжо традыцыйная  сустрэча маладых і перспектыўных з кіраўніцтвам Расонскага райвыканкама ў асобе старшыні Аляксандра Мікалаевіча Шубскага. 

Аляксандр Мікалаевіч, выйшаўшы на трыбуну, гаварыў з хлопцамі і дзяўчатамі  хутчэй не як кіраўнік раёна, а як старэйшы сябар і дарадца. Ён раіў перш за ўсё прыгледзецца да таго незвычайнага месца, куды іх закінуў лёс, і зразумець, што лепшага на зямлі няма. Цудоўныя краявіды, амаль дзве сотні азёр, шчырыя людзі. А яшчэ пасёлак, у якога ёсць усе перспектывы ператварыцца ў сучасны і камфортны агульны дом. З тым, што ўжо зроблена для гэтага, маладыя спецыялісты маглі пазнаёміцца ў час своеасаблівай экскурсіі па фізкультурна-аздараўленчым комплексе і адноўленым раённаму Доме культуры.

 Аляксандр Мікалаевіч падрэсліў, што мы толькі ў пачатку шляху. Наперадзе яшчэ вельмі шмат планаў, рэалізоўваць якія трэба ў тым ліку і для прысутных хлопцаў і дзяўчат. Каб яны заставаліся жыць і працаваць на Расоншчыне, стваралі сем’і, нара-джалі дзяцей, а пры старанні і прафесіяналізме кар’ерны рост кожнаму з іх гарантаваны.

«Я сам быў выпускніком інстытута і ведаю, як цяжка абжывацца на новым месцы, – падкрэсліў старшыня райвыканкама. – Але каб дапамагчы і падтрымаць вас у вырашэнні праблемы любога характару, ёсць не толькі аддзел па справах моладзі і райкам БРСМ, але і кіраўніцтва райвыканкама. Дзверы майго кабінета заўсёды для вас адчынены. Прыходзьце, званіце, прапаноўвайце. Мы заўсёды рады ініцыятыве».

І першая просьба з вуснаў пачынаючыга выкладчыка дзіцячай школы мастацтваў Дзіны Лебе-дзевай прагучала адразу пасля выступлення Аляксандра Мікалаевіча. Яна пацікавілася, калі ў будынку ўстановы культуры з’явіцца туалетны пакой. Старшыня райвыканкама падзякаваў за пытанне і паабяцаў, што абавязкова  прыме меры, каб зняць гэтую праблему.

...Прыйшоў час уручэння хлопцам і дзяўчатам Дыпломаў маладых спецыялістаў. Да вядучых сустрэчы – начальніка аддзела па справах моладзі райвыканкама Наталлі Дзедзінец і першага сакратара райкама БРСМ Алены Герасімавай – лёгкай паходкай па чарзе падыходзілі пачынаючыя работнікі лясгаса, урач-тэрапеўт, маладыя настаўнікі, спецыялісты ў галіне сельскай гаспадаркі, гандлёвыя работнікі, інжынер па якасці ПМК-63, інжынер па кадастру ПМС, супрацоўнік аддзела па надзвычайных сітуацыях, інструктар-метадыст па турызме, работнік аддзела статыстыкі. Кожны з іх атрымаў, акрамя Дыплома, і сваю порцыю апладысментаў.

На сустрэчу таксама былі запрошаны і прапанавалі
маладым спецыялістам, безумоўна, цікавую для іх інфармацыю вядучы спецыяліст аддзела архітэктуры і будаўніцтва райвыканкама Таццяна Мікалаеўна Хамчаноўская і прадстаўнік аддзялення ААТ «АСБ Беларусбанк» Ірына Аркадзьеўна Пятроўская. А падвяла своеасаблівыя вынікі намеснік старшыні райвыканкама Галіна Аляксееўна Падвіцельская, якая яшчэ раз павіншавала маладых людзей з пачаткам працоўнага шляху і пажадала, каб Расоншчына стала для іх роднай зямлёй.

...Калі былі сказаны вядучымі развітальныя словы, я прапанавала Аляксандру Мікалаевічу сфатаграфавацца разам з моладдзю на памяць. Гэты здымак вы і бачыце ўверсе. Гледзячы на яго, цяжка ўтрымацца ад, магчыма, банальнага   выказвання: «Вось яна – будучыня Расоншчыны». Але  ж лепш сказаць складана.