Дзень работнікаў жыллёва-камунальнай гаспадаркі і бытавога абслугоўвання насельніцтва адзначаецца кожную чацвёртую нядзелю сакавіка. Свята даволі маладое. Прэзідэнт Рэспублікі Беларусь падпісаў Указ аб правядзенні ў краіне гэтага прафесійнага дня 26 сакавіка 1998 года. Аднак свята хутка стала папулярным сярод насельніцтва. Яно і зразумела. Лічыцца, што адной з самых старадаўніх галін эканомікі ў Беларусі з’яўляецца менавіта камунальная. У цяперашні час жыллёва-камунальная гаспадарка працуе над паляпшэннем прадастаўлення якасных паслуг. У краіне і ў раёне ў прыватнасці вядуцца работы па прыцягненні новых рэсурсаў зберагальных тэхналогій. Павышаецца надзейнасць інжынерных сістэм. Акрамя таго, камунальная галіна стварае добрыя і бяспечныя ўмовы працы.
Метавіта з дапамогай службаў бытавога абслугоўвання насельніцтва і жыллёва-камунальнай гаспадаркі становяццца прыгожымі гарады, райцэнтры, вёскі, ствараецца ўтульная і спрыяльная атмасфера для жыцця людзей.
Натуральна, прафесійнае свята – гэта не толькі ўзнагароды, але і добрая традыцыя падвесці вынікі. Пра гэта наша размова з дырэктарам жыллёва-камунальнай гаспадаркі Аляксандрам Пятровічам. – Якім быў 2012 для вашай галіны?– У цэлым, калі меркаваць па паказчыках, мы спрацавалі нядрэнна. Прадпрыемства забяспечыла выкананне асноўных паказчыкаў бізнес-плана развіцця на 2012 год: тэмп росту аб’ёму вытворчасці склаў 160 працэнтаў пры плане 127, 8 працэнта. Узровень рэнтабельнасці – 1,9 працэнта пры плане 0, 9. Прыбытак ад рэалізацыі склаў 438 мільёнаў рублёў пры планавым заданні 173 мільёны. Месячны заробак за снежань бягучага года склаў 3 мільёны 140 тысяч рублёў. Тэмп росту зарплаты ўзрос да 167 працэнтаў. Выканала прадпрыемства і штогадовае заданне па замене цепласетак. Пры плане ў 2,5 кіламетра замянілі 3. У гэтым годзе заменім трубы ў Забор’і, аграгарадку Краснаполле і райцэнтры.
– Калі казаць не мовай лічбаў, а справамі, што было зроблена за гэты год?– У 2012 годзе прадпрыемствам асвоена 5мільярдаў 141мільён інвестыцый асноўнага капіталу. Уведзены ў эксплуатацыю першы комплекс станцыіі абезжалезвання вады коштам 6 мільярдаў 700 мільёнаў рублёў. Жыхары, думаю, ужо адчулі смак чыстай вады. У гэтым годзе плануецца ўвесці ў эксплуатацыю і другі пускавы комплекс, што дазволіць станцыіі працаваць у поўную сілу. Аднаўляем работу па будаўніцтве ачышчальных збудаванняў. Да канца года запланавана здача гэтых аб’ектаў. Распачаты работы па рэканструкцыі кацельнай па вуліцы Савецкая. Кошт праекта практычна 6 мільярдаў рублёў. Будуем склады пад паліўную дранку, паколькі аб’ёмы яе пастаянна павялічваюцца. Новыя памяшканні разлічаны на 10-12 тысяч кубаметраў паліва. Таму працы хапае і працоўныя рукі заўсёды патрэбныя. Дзякуй богу, кадравага голаду на прадпрыемстве няма.
– 2013 год аб’яўлены Годам беражлівасці. Як працуеце ў гэтым накірунку?Укамплектавалі кацельныя помпавым, энергазберагальным абсталяваннем. Зараз працуем па жылфондзе: усталёўваем датчыкі руху на адключэнне асвятлення на лесвічных клетках. Што тычыцца вулічнага асвятлення, на ліхтарах таксама ўстаноўлены энергазберагальныя лямпачкі. Карацей, робім усё магчымае для эканоміі.
– Колькі сёння людзей працуе ў ЖКГ?– Па колькасці рабочых рук, у адрозненні з мінулым годам, мы «прыраслі». Калі раней на прадпрыемстве працавала 277 чалавек, то сёння 305. Вядома, шматлікія працаўнікі сезонныя, але, тым не менш, прагрэс ёсць.
– Працуеце над якасцю абслугоўвання?– Гэта наша асноўная задача – паляпшаць прадастаўленне якасных паслуг. Натуральна, пашыраем спектр платных і ўвогуле імкнёмся ні ў чым не адмаўляць насельніцтву. Робім усё, каб у дамах было цёпла і ўтульна.
– З’явіліся новыя паслугі?–Хутчэй аднавіліся старыя. Працаўнікі галіны займаюцца і рамонтам, і будаўніцтвам: клеяць шпалеры, распілоўваюць дровы. На прадпрыемстве магчыма скарыстацца і транспартнымі паслугамі: заказаць трактар альбо легкавы аўтамабіль.
– Якая паслуга сёння самая папулярная сярод насельніцтва?– Устаноўка прыбораў уліку вады. У сувязі з тым, што тарыфы павялічваюцца, людзі «прачнуліся» і зразумелі, што мець лічыльнікі сёння выгадна. Мы спрасцілі гэтую працэдуру, і цяпер, каб устанавіць лічыльнік, чалавеку патрэбна толькі падаць заяўку. Можна гэта зрабіць нават па тэлефоне, пасля чаго нашы спецыялісты прыедуць, паставяць лічыльнік, на месцы возьмуць аплату, выдадуць квітанцыю. І не трэба нікуды хадзіць. Кошт такой паслугі складае 250 тысяч рублёў.
– З якімі праблемамі ў мінулым годзе давялося сутыкнуцца?– З падрыхтоўкай да ацяпляльнага сезона. Мы заканчвалі рамонт катлоў, таму на працягу 10 дзён снежня назіралася парушэнне тэмпературнага рэжыму. Гэта адчулі ўсе жыхары райцэнтра. Дзякуй людзям, што вытрымалі гэта выпрабаванне. У астатнім зіма прайшла нармальна.
– За ўсімі паказчыкамі стаяць людзі. Як вы сёння іх стымулюеце?– Вядома, у нас ёсць людзі, якія працуюць добрасумленна і робяць гэта з аддачай. І да іх зусім іншае стаўленне з боку кіраўніцтва. Ім аб’яўляюцца падзякі, у грашовым выражэнні – надбаўкі, прэміі, устанаўліваецца пэўны тарыф на зарплату. Калі чалавек хоча зарабіць, магчымасць мы прадастаўляем.
Адпаведна, і ў Дзень камунальніка адзначым лепшых. Два чалавекі атрымаюць абласныя граматы. Гэта Артур Васільеў, начальнік ВУ №1, і вадзіцель смеццявоза Мікалай Клімовіч. 11 чалавек атрымаюць Граматы ад прадпрыемства і 15-ці аб’яўляецца Падзяка за працу.
У прафесійнае свята я хачу па-віншаваць усіх работнікаў галіны ЖКГ, падзякаваць ім за штодзённую нялёгкую працу і пажадаць сіл, здароўя, радасці ў жыцці і разумення як з боку насельніцтва, так і з боку кіраўніцтва.
