5 ліпеня прайшло свята ў гонар 400-годдзя прыбыцця ў Будслаў цудатворнага абраза Божай Маці. У гэтым годзе ўрачыстасць была як ніколі маштабнай – у невялікім гарадку Мінскай вобласці сабралася каля 50 тысяч паломнікаў. Сярод іх шасцёра з нашага раёна.
– Адны ішлі пешшу, іншыя абралі для сябе не менш цяжкі, але больш хуткі транспарт – веласіпеды, – распавядае ўдзельніца паломніцтва Аксана Хаданёнак. – Дарэчы, групу паломнікаў-веласіпедыстаў узначаліў Мітрапаліт Мінскі і Магілёўскі архібіскуп Тадэвуш Кандрусевіч.
Хтосьці дабіраўся да святыні на аўтамабілі, цягніку і нават самалёце. Але сутнасць ад спосабу перамяшчэння не мяняецца. Перш за ўсё – гэта яднанне чалавека з Богам.
Наша група выйшла ў Будслаў 24 чэрвеня. 5 дзён мы пераадольвалі шлях у 150 кіламетраў. Да нашай групы далучыліся талачынцы, палачане і жыхары Наваполацка. Усяго каля 120 чалавек. У групе ішла ў асноўным моладзь, але былі і людзі старэйшага ўзросту, а таксама дзеці. Некаторыя рашыліся на паломніцтва ўпершыню, большасць жа – пілігрымы са стажам.
Пачаўся паход са збораў, рэгістрацыі і благаславення святара. Вялікія заплечнікі і сумкі мы склалі ў грузавік, які адвозіў рэчы на месца начлегу. З сабой бралі мінімум – бутэльку вады, бо прахалоды ад надвор’я чакаць не прыйшлося, і малітвеннік. Пыл, пякучае сонца і бясконцая дарога… Вядома, было складана, але нягледзячы на стомленасць ні адзін чалавек не перасеў на машыну, якая суправаджала групу. Таму, дайшоўшы да храма, пілігрымы радаваліся!
Па словах Аксаны, увайшоўшы ў храм, усе становяцца на калені і так ідуць да самай іконы Божай Маці. Хтосьці кладзецца на падлогу перад выявай, хтосьці плача, іншыя па паўгадзіны стаяць перад абразам і моляцца, просяць пра тое, з чым ішлі ў пілігрымцы ўсе гэтыя дні.
Імша і іншыя набажэнствы доўжыліся ў Будславе ўсю ноч. Асабліва прыгожай была начная працэсія са свечкамі. Пасля яе моладзь адправілася на канцэрт. Увогуле, хвалебныя спевы і шчырыя малітвы не сціхалі на працягу некалькіх дзён. А вернікі змаглі не толькі памаліцца каля абраза Маці Божай Будслаўскай, але і звярнуцца са сваімі асабістымі просьбамі-малітвамі да яшчэ адной святыні – рэліквій Святой Тэрэзы.
Агульная імша аб’яднала святароў і вернікаў з Беларусі, Польшчы, Украіны, Румыніі і Італіі. Яе ўзначаліў Папскі легат кардынал Жан Луі Таран. Словы святога пісання гучалі на дзясятках моў. Завяршэннем будслаўскіх урачыстасцяў стала гашэнне паштовай маркі ў гонар 400-годдзя знаходжання цудатворнага абраза Маці Божай у Будславе.
ДАВЕДКАЦудатворны абраз Маці Божай Будслаўскай лічыцца заступнікам Беларусі. Ікона была напісана ў 1598 годзе ў Рыме і падорана Папам Кліментам VIII мінскаму ваяводу Яну Пацу. З тых часоў абраз мае багатую гісторыю і славіцца цудамі вылечвання. З пачатку 1990-х гадоў адраджаецца яго культ, у Будслаў ідуць дзесяткі тысяч пілігрымаў з усёй Беларусі, і да даты каранацыі абраза ў мясцовым санктуарыі штогод праходзіць фестываль – галоўная падзея года для беларускіх католікаў.
