Шостага чэрвеня  сваё прафесійнае свята – Дзень меліяратара адзначаць працаўнікі Расонскага унітарнага прадпрыемства меліярацыйных сістэм, а ўжо сёння пройдзе ўрачысты сход, на які запрошаны ўвесь немалы калектыў і ветэраны. Ім раскажуць пра справы і дасягненні, а перадавікам вытворчасці па традыцыі ўручаць падарункі і грашовыя прэміі.
Пакуль жа ў Расонскім ПМС пануе звычайная рабочая атмасфера. Вытворчыя падраздзяленні працуюць на планавых аб’ектах. Напрыклад, усяго імі сёлета будзе пабудавана 7 катэджаў. Акрамя жылля, меліярацыйныя брыгады і тэхніка задзейнічаны на будаўніцтве станцыі абезжалезавання вады і рэзервуараў чыстай вады, дзе ў красавіку-маі было выканана работ на 300 мільёнаў рублёў. Таксама неўзабаве неабходна пабудаваць санітарна-бытавы корпус на ачышачальных, дзе павінна быць выканана аб’ёмаў яшчэ на 280 мільёнаў рублёў.
Не забываюцца меліяратары і на профільныя віды дзейнасці. Так, у рамках абласной праграмы “Чыстае поле” Расонскаму ПМС выдзелена 250 мільёнаў рублёў, на якія трэба выдаліць хмызняк на палях, зрабіць раскарчоўку, выдаліць вымачкі. Адным словам, прывесці палі ў раёне ў ідэальны стан.
На 100 гектарах плошчаў праводзіцца аграмеліярацыя, ідзе рэканструкцыя земляў у сельгаскааператыве “Клясціцы”. Адставанне ад запланаванага задання, якое ўзнікла ў першым квартале і было звязана з незвычайна марознай зімой, паступова наганяецца. Дырэктар ПМС Мікалай Міхайлавіч Канарскі ўпэўнены, што па паўгоддзі ўсе паказчыкі будуць выкананы і Расонскае прадпрыемства меліярацыйных сістэм, як і раней, замацуецца на верхніх радках у выніковых зводках КУП “Віцебскмеліявадгас”.
Што да прафесійнага свята, то з яго нагоды будуць ушаноўваць бульдазерыста Валерыя Жалязнова, кіраўнікоў будаўнічага падраздзялення Пятра Адамовіча і Сяргея Бардадынава, маладога машыніста экскаватара Валерыя Рыбакова (на здымку), які працуе цяпер на ачыстцы рэчышча ручая Кісель у райцэнтры. Ёсць і яшчэ адна прыемная навіна: за добрасумленную работу на меліярацыйным будаўніцтве, кваліфікаванае выкананне абавязкаў і ў сувязі з Днём меліяратара Ганаровай граматай КУП “Віцебскмеліявадгас” узнагароджаны вадзіцель аўтамабіля Анатоль Васільеў.
Увогуле працавітых, старанных і ўмелых людзей, што падтрымліваюць і павышаюць аўтарытэт калектыву, плённай працай памнажаюць агульныя і ўласныя здабыткі, тут нямала, і кожнага ўшануюць па заслугах.
Пакуль жа прадастаўляем слова дырэктару прадпрыемства Мікалаю Канарскаму, які шчыра віншуе ўсіх сённяшніх работнікаў, а таксама былых, хто ўжо на адпачынку, з прафесійным святам: “Вялікі дзякуй усім за добрую працу. Моцнага здароўя, шчасця і поспехаў вам!”